काठमाडौं । तिन खेलको टि२० आई सिरिजका लागि इंग्ल्यान्ड भ्रमणमा रहेको अस्ट्रेलियाले पहिलो टि ट्वान्टी आईमा जित निकालेको छ ।
इंग्ल्यान्डको साउथह्याम्टनमा भएको खेलमा भ्रमणकारी टोली अस्ट्रेलियाले पहिलो टि ट्वान्टी खेल २८ रनले जितेको हो । जितसँगै पाहुना टोली अस्ट्रेलियाले ३ खेलको सिरिजमा १-० को अग्रता बनाएको छ ।
पाहुना टोलीले दिएको १ सय ८० रनको लक्ष्य पछ्याएको घरेलु टोली १९.२ ओभरमा १ सय ५१ रन बनाउदै अल आउट भयो ।
घरेलु टोलीका लागि लियम लिविगंस्टोनले ३७, ओपनर तथा कप्तान फिल साल्टले १२ बलमा २०, साम करनले १५ बलमा १८ तथा जोर्डन कक्सले १२ बलमा १७ रन जोडे ।
पाहुना टोलीका लागि सन एबटले ३, जोस हेजलवुड र एडम जाम्पाले समान २ तथा जेभिएर ब्राटलेट, क्यामरुन ग्रीन र मार्कस स्टोईनेसले समान १ विकेट लिए ।
त्यसअघि टस हारेर पहिले ब्याटिङ गरेको पाहुना टोली १९.३ ओभरमा १ सय ७९ रन बनाउदै अल आउट भयो ।
टोलीका लागि ओपनर ट्राभिस हेडले सर्वाधिक ५९ रनको अर्धशतकीय ईनिङ खेले । प्लेयर अफ द म्याच भएका हेडले २३ बलमा ८ चौका र ४ छक्का प्रहार गरे । अर्का ओपनर म्याथ्यु शर्टले २६ बलमा ४ चौका र २ छक्काको सहयोगमा ४१ तथा विकेट किपर जोस इङ्ग्लिसले २७ बलमा ३७ रन जोडे ।
क्यामरुन ग्रीनले १३ तथा मार्कस स्टोनेसले १० रन जोडे ।
घरेल टोलीका लागि लियम लिविगंस्टोनले ३, सकिब मोहम्मद र जोफ्रा आर्चरले समान २ तथा आदिल राशिद र साम करनले समान १ विकेट लिए ।
दुई टोलीबीचको दोस्रो टी२० आई शुक्रबार र तेस्रो टि२० आई आइतवार छ ।
