काठमाडौं । नेपालले मलेसियामा जारी एसीसी महिला प्रिमियर कपको सेमिफाइनलमा स्थान बनाएको छ । सेमिफाइनलमा स्थान बनाउँने क्रममा नेपालले कुवेतलाई पराजित गरेको हो ।
मलेसियाको बांगीमा नेपालले कुवेतलाई ८ विकेटले पराजित गरेको हो । नेपालले शुक्रबार मलेसियासँग फाइनल प्रवेशका लागि खेल्नेछ । बुधबार नै भएकाे अर्काे क्वाटरफाइनलमा जापानलाइ पराजित गर्दै मलेसियाले सेमिफाइनलमा स्थान बनाएकाे हाे ।
शुक्रबार मलेसियालाई पराजित गरेमा नेपाल पहिलो पटक एसिया कपका लागि छनोट हुनेछ ।
कुवेतले ७४ रनको लक्ष्य दिएको भएपनि वर्षाका कारण नेपाललाई १२ ओभरमा ५० रनको नयाँ लक्ष्य मिलेको थियो । ५० रनको लक्ष्य नेपालले ६ दशमलब ५ ओभरमा २ विकेट गुमाएर पूरा गर्यो ।
नेपालका लागि कप्तान ईन्दु बर्माले २१ बलमा अविजित २२ तथा सीता राना मगरले १५ बलमा १७ रन बनाईन् । सीता र ईन्दुले दोस्रो विकेटका लागि ३४ बलमा ४० रनको साझेदारी गरे । कविता जाेशी ४ रनमा अविजित रहिन् ।
त्यसअघि टस जितेर पहिले ब्याटिङ गरेको कुवेतले निर्धारित २० ओभरमा ९ विकेट गुमाएर ७३ रन बनाएकाे थियाे ।
कुवेतका लागि ओपनर प्रियन्दा मुरलीले ३३ बलमा २९ तथा शान्थी बालासुप्रमन्यम र खादिजा खालिलले समान १३/१३ रन बनाए । कुवेतका अन्य ब्याटरले दोहोरो अंकमा रन बनाउन सकेनन् ।
नेपालका लागि सीता रानामगरले ह्याट्रिक सहित तीन तथा रुबिना क्षेत्री र कविता कुँवरले समान दुई दुई विकेट लिए ।
नेपालले समूह चरणको पहिलो खेलमा हङकङलाई तथा दोस्रो खेलमा भुटानमाथि समान आठ आठ विकेटले र तेस्रो खेलमा माल्दिभ्सलाई २ सय १४ रनले हराएको थियो ।
प्रतियोगिताको फाइनल पुग्ने दुई टोलीले एसिया कपमा स्थान बनाउँने छन् । शुक्रबार प्रतियोगिताको सेमिफाइनल खेल हुनेछ ।
