दक्षिण अफ्रीकालाई तेश्रो टेस्टमा पनि एकतर्फी ढंगले पराजित गर्दै भारतले घरेलु मैदानमा ३ टेस्टको सिरिज ३-० ले क्लिन स्विप गरेको छ। घरेलु भुमिमा यो भारतको लगातार ११ औं टेस्ट सिरिज जित हो।
राँचीमा सम्पन्न तेश्रो टेस्टमा दक्षिण अफ्रिकी टिम इनिंग र २०२ रनको विशाल अन्तरले पराजित भयो। यस अघि पहिलो टेस्ट २०३ रनले तथा दोश्रो टेस्ट इनिंग र १३७ रनले भारतले जितेको थियो।
पहिलो इनिंगमा भारतले ४९७/९ को योगफलमा इनिंग घोषणा गरेको थियो। त्यसपछि दक्षिण अफ्रीकाले पहिलो इनिंगमा १६२ रनमै सम्पूर्ण विकेट गुमाउन पुगेपछि भारतले फलो-अन दिएको थियो। पुनः ब्याटिंग गर्ने क्रममा दक्षिण अफ्रीका १३३ रनमा अल-आउट हुन पुग्यो र टेस्ट विशाल अन्तरले हार्न पुग्यो।
दोश्रो इनिंगमा दक्षिण अफ्रीकालाई सानो योगफलमा समेट्न मोहम्मद शामीले ३ तथा उमेश यादब र शाहबाज नदीमले समान २/२ विकेट लिए। रभिंद्र जडेजा र रभीचन्द्रन आश्विनले १/१ विकेट लिए। दक्षिण अफ्रीकाको लागि थेउनिस डी ब्रुएनले सर्वाधिक ३० रन बनाए।
तेश्रो टेस्ट र सिरिजकै उत्कृस्ट खेलाडी रोहित शर्मा चुनिए। रोहितले पहिलो टेस्टको दुवै इनिंगमा शतक ( १७६ र १२७ ) तथा तेश्रो टेस्टमा दोहोरो शतक ( २१२ ) बनाएका थिए।
दक्षिण अफ्रीकाको टेस्ट इतिहासमै ईनिंग र २०२ रनको हार चौथो ठुलो हो। अन्तर्राष्ट्रिय क्रिकेटमा फिर्ता भएपछि दक्षिण अफ्रीकाले ३-० ले सिरिज हार बेहोरेको यो मात्र तेश्रो पटक हो। यस अघि सन् २००५ र २००१ मा अस्ट्रेलियाले दक्षिण अफ्रीकालाई ३-० ले पराजित गरेको थियो।
