काठमाडौं । ओमानमाथि नामिबियाले विश्वकप लिग टू सिरिज अन्तर्गतको खेलमा जित हात पारेको छ ।
लिग टू सिरिज अन्तर्गत स्कटल्यान्डमा जारी ओमान, नामिबिया र घरेलु टोलीबीचको त्रिकोणात्मक सिरिजको दोस्रो खेल नामिबियाले ६ विकेटको जित हात पारेको हो ।
ओमानले दिएको २ सय ३४ रनको लक्ष्य नामिबियाले ४७ दशमलब ४ ओभरमा ४ विकेट गुमाएर पूरा गर्यो ।
नामिबियाका लागि जेन फ्यालिंकले ८१ बलमा ७३ तथा कप्तान ग्रेहार्ड इरास्मसले ४६ बलमा ३६ रन बनाए । जेजे स्मिथले ३७ बलमा अविजित ४४ तथा माईकल भान लिंगेनले ४१ बलमा ३० रन बनाए ।
ओमानका लागि बिलाल खानले दुई तथा जय ओडेरा र जिशान मक्शुदले समान एक एक विकेट लिए ।
त्यसअघि टस हारेर पहिले ब्याटिङ गरेको ओमानले ५० ओभरमा ८ विकेट गुमाएर २ सय ३३ रन बनाएको थियो ।
ओमानका लागि जिशान मक्शुद र खालीद कैलले समान ५१ ५१ तथा कप्तान अकिव इल्यासले ३९ रन बनाए ।
नामिबियाका लागि बेन सिङ्कन्गोले चार विकेट लिए ।
जितसँगै आठ टोली सहभागी लिग टू को अंक तालिकामा नामिबिया आठ अंकका साथ दोस्रो स्थानमा कायमै छ । लिग टू अन्तर्गत दोस्रो खेलेको ओमान एक अंकका साथ छैटौं स्थानमा छ । क्यानडा आठ अंकका साथ शीर्ष स्थानमा छ । अंकतालिकामा दुई अंकका साथ नेपाल पाँचौं स्थानमा छ ।
लिग टूको शीर्ष चार टोलीले २०२७ हुने ओडिआई विश्वकप छनोटमा स्थान बनाउँने छन् ।
