काठमाडौं – नामिबियामा त्रिकोणात्मक टि२० आई सिरिजको पहिलो खेलमा युएईले घरेलु टोलीमाथि जित हासिल गरेको छ ।
युएईले नामिबियामाथि ४० रनको जित निकालेको हो । जितसँगै तीन टोली सहभागी सिरिजमा २ अंकका साथ युएई शीर्ष स्थानमा उक्लिएको छ । सिरिजमा युएई, घरेलु टोली र अमेरिकाको सहभागीता रहेको छ ।
युएईले दिएको २ सय ४६ रनको विशाल लक्ष्य पछ्याएको नामिबियाले निर्धारित २० ओभरमा ८ विकेट गुमाएर २ सय ५ रन मात्र जोड्न सक्यो ।
नामिबियाका लागि ओपनर जेपी कोट्जेले सर्वाधिक ५५ तथा जेजे स्मिटले १९ बलमा ३८ रन जोडे । कप्तान ग्रहार्ड इरास्मसले १९ बलमा ३७, जान निकोल लेफ्टी इटनले २५ तथा जाय फ्रायलिंकले २० रन बनाए ।
युएईका लागि मोहम्मद जगदुल्लाह, अलि नासिर र बासिल हमिदले समान २ तथा बिष्नु सुकुमारन र आयान खानले समान १ विकेट लिए ।
त्यसअघि टस हारेर पहिले ब्याटिङकोगरेको युएईले २० ओभरमा २ विकेट गुमाएर २ सय ४५ रनको योगफल तयार गरेको थियो ।
टि२० आईमा युएईले बनाएको यो सबैभन्दा उच्च योगफल हो । यसअघि गएको अप्रिलमा बहराईनविरुद्ध उसले २ सय ३६ रनको योगफल तयार गरेको थियो ।
युएईका लागि ओपनरद्वय अलिसान सरफु र मोहम्मद वासिमले अर्धशतकीय ईनिङ खेल्दै पहिलो विकेटका लागि १ सय ३० रनको साझेदारी गरेका थिए । सरफुले ३३ बलमा ८ चौका र ४ छक्काको सहयोगमा ७३ तथा कप्तान वासिमले ५० बलमा ६ चौका र ६ छक्काको सहयोगमा नट आउट ८९ रन जोडेका थिए ।
आसिफ खानले २२ बलमा ३९ तथा बासिल हमिदले १५ बलमा नट आउट ३७ रन बनाएका थिए । नामिबियाका लागि कप्तान ग्रेहार्ड इरास्मसले २ विकेट लिएका थिए ।
