काठमाडौं । नेपाली बलरको शानदार बलिङ प्रदर्शनमा नेपालले नेदरल्यान्ड्समाथि सहज जित हात पारेको छ ।
टियु क्रिकेट मैदान कीर्तिपुरमा भएको खेलमा नेपाल ६ विकेटले विजयी भएको हो । यस जितका साथ नेपालले फाइनल सम्भावना बलियो बनाएको छ ।
नेदरल्यान्ड्सले दिएको १ सय २१ रनको लक्ष्य नेपालले १५ दशमलब २ ओभरमा ४ विकेट गुमाएर पूरा गर्यो ।
नेपालका लागि कप्तान रोहितकुमार पौडेलले ३४ बलमा ३ चौका र १ छक्काको सहयोगमा ४६ रन बनाए । पौडेल भिभियन किंग्माको बलमा आउट भए । गुलसन झाले ३६ बलमा २ चौका र १ छक्काको सहयोगमा ३८ रन बनाए । तेस्रो विकेटका लागि झा र कप्तान पौडेलले ८६ रनको साझेदारी गरे । झा आर्याज दत्तको बलमा आउट भए ।
ओपनर कुशल भुर्तेलले ८ बलमा १२ तथा अर्का ओपनर आशिफ शेखले ८ बलमा ८ रन बनाए । नेपालका दुवै ओपनरलाई भिभियन किंग्माले आउट गराए ।
त्यसअघि टस जितेर पहिले ब्याटिङ गरेको नेदरल्यान्ड्सले १९ दशमलब ३ ओभरमा अल आउट हुदै १ सय २० रन मात्र बनाएको थियो ।
नेदरल्यान्ड्सका लागि ओपनर म्याक्स ओडाउडले २४ बलमा १८ रन बनाए । म्याक्स प्रतिश जिशीको बलमा बोल्ड आउट भए । कप्तान स्कट एडवार्डसले २१ बलमा १८ रन बनाए । कप्तान एडवार्डस प्रतिस जिशीको बलमा नै बोल्ड आउट गरे ।
टिम भान डेर गुग्टेनले २६ बलमा २४ रन बनाए । टिम दीपेन्द्रसिंह ऐरीको बलमा आउट भए । रोलेफ भान डेर मिर्रोले १४ बलमा १ चौका र १ छक्काको सहयोगमा अविजित २३ रन बनाए । नेदरल्यान्ड्सका अन्य ब्याटरले दोहोरो अंकमा रन बनाउन सकेनन् ।
नेपालका लागि करण केसीले पहिलो ओभरमा नै दुई विकेट दिलाएका थिए । तेस्रो विकेटका लागि कप्तान एडवार्डस र म्याक्सबीच ५० रनको साझेदारी भएको थियो । यो साझेदारीबाट नेदरल्यान्ड्स खेलमा फर्कने कोशीश गरे पनि त्यसपछि नियमित विकेट गुमाउँदा कम योगफलमा समेटियो ।
नेपालका लागि प्रतिश जिशीले ३ तथा करण केसीले २ विकेट लिए ।
नामिबिया र नेदरल्याण्ड्सबीचमा ३ मार्च अर्थात फागुन २० मा समूह चरणको अन्तिम खेल हुनेछ ।
समूह चरणका शीर्ष दुइ टोलीबीच ५ मार्च अर्थात फागुन २२ मा फाइनल खेल हुनेछ । खेलहरु नेपाली समयअनुसार बिहान साढे ११ मा सुरु हुनेछ ।
