काठमाडौं । आयरल्यान्ड ए सँग घरेलु टोली नेपालले दुई खेलको टी-ट्वान्टी सिरिज आज (सोमबार) बाट खेल्दै छ।
कीर्तिपुरस्थित टियु क्रिकेट मैदानमा हुने सिरिजअन्तर्गत पहिलो खेल दिउँसो १ बजेबाट शुरू हुने छ।
सिरिजका लागि आयरल्यान्ड वुल्भ्सको टोली नेपाल आइसकेको छ। आयरल्यान्ड ए लाई वुल्भ्सको नामले समेत चिनिन्छ ।
सिरिजमा सिनियर नेपाली टोलीले आयरल्यान्ड ए सँग दोस्रो खेल मंगलबार खेल्ने छ।
यसलगत्तै नेपालले भारतमा बरोडा र गुजरात क्रिकेट टोलीसँग त्रिकोणात्मक सिरिज खेल्ने छ । सिरिज ३१ मार्च देखि ७ अप्रिलसम्म हुने छ । सिरिजमा हरेक टोलीले हरेकसँग दुई दुई खेल खेल्ने छन् । ३१ मार्चमा नेपाल र गुजरातबीच खेल हुँदा १ अप्रिलमा बरोडा र गुजरात खेल्नेछन् ।
२ अप्रिलमा नेपाल र बरोडा तथा ३ अप्रिलमा नेपाल र गुजरातबीच खेल हुनेछ । ४ अप्रिलमा बरोडा र गुजरातबीच खेल हुँदा ५ अप्रिल नेपाल र बरोडाबीच समूह चरण अन्तिम खेल हुनेछ । समूह चरणको खेलमा शीर्ष दुई टोलीबीच ७ अप्रिलमा फाइनल खेल हुनेछ ।
यस सिरिजलाई एसीसी प्रिमियर कपको तयारीका स्वरुप हेरिएको छ । एसीसी प्रिमियर कप १२ अप्रिल देखि २१ अप्रिलसम्म ओमानमा आयोजना हुदैछ ।
यस्तै, नेपाल क्रिकेट संघ (क्यान)ले रोहितकुमार पौडेलको कप्तानीमा १५ सदस्सीय टोली घोषणा गरिसकेको छ।
नेपाली टोली
रोहितकुमार पौडेल(कप्तान), कुशल भुर्तेल, आसिफ शेख, कुशल मल्ल, सन्दीप जोरा, विवेक यादव, गुलसन झा, अनिल शाह, दीपेन्द्रसिंह ऐरी, ललितनारायण राजवंशी, प्रतिश जिसी, आकाश चन्द, करण केसी, सोमपाल कामी, अभिनास बाहोरा ।
