काठमाडौं (हाम्रो खेलकुद) – क्यानडामा जारी रहेको ग्लोबल टि ट्वान्टी लिगमा नेपाली राष्ट्रिय क्रिकेट टिमका कप्तान रोहितकुमार पौडेल सम्मिलित टोरोन्टो नेसनल्सले इलिमिनेटर खेल खेल्दैछ । टोरोन्टोले ईलिमिनेटर खेलमा बंग्ला टाइगर्ससँग खेल्दैछ । ईलिमिनेटर खेल क्यानडाको ब्राम्प्टनमा रहेको सिएए सेन्टरमा नेपाली समय अनुसार शनिबार बिहान १ः४५ मा हुदैछ ।
यस खेलमा रोहितले खेल्ने सम्भावना उच्च रहेको छ । टोरोन्टोको टोलीमा साद विन जाफर तथा निकोलस किर्तन नरहने हुँदा रोहितले प्लेईङ-११ मौका पाउने सम्भावना छ । विश्वकप लिग टू सिरिजका लागि क्यानडाको टोली नेदरल्यान्डस्मा रहेको छ । कप्तान किर्तन तथा पुर्व कप्तान जाफर टोलीसँगै नेदरल्यान्ड्स पुगिसकेका छन् ।
टोरोन्टोले समूह चरणका ७ मध्ये ३ मा जित र ३ मा हार बेहार्दा १ खेल भने वर्षाका कारण रद्द भएको थियो । टोरोन्टोले चौथो स्थानमा रहेर प्लेअफमा स्थान बनाएको थियो । उता, बंग्लाले भने ७ मध्ये ४ खेलमा जित हात पारेको थियो । बंग्ला तेस्रो स्थानमा रहेर प्लेअफमा स्थान बनाएको थियो ।
नेपाली राष्ट्रिय क्रिकेट टोलीका अलराउन्डर दीपेन्द्रसिंह ऐरी तथा लेग स्पिनर सन्दीप लामिछाने सम्मिलित भेनकुवर नाईट्स भने लिग चरणाबाट बाहिरिएको थियो ।
