काठमाडौं । कप्तान विनोद भण्डारीको शतकको सहयोगमा जारी प्रधानमन्त्री कपमा त्रिभुवन आर्मीले कर्णाली प्रदेशलाई पराजित गरेको छ ।
टीयु मैदान कीर्तिपुरमा भएको खेलमा आर्मी १ सय ६४ रनको फराकिलो अन्तरले जित निकालेको हो ।
आर्मीले दिएको २ सय ८० रनको लक्ष्य पछ्याएको कर्णाली २९ ओभरमा १ सय १५ रन बनाएर अल आउट भयो ।
कर्णालीका लागि हिमाशुं शाहीले २२ बलमा १९ तथा विपीन शाहीले १० बलमा १४ रन बनाए । दिवान पुन १४ बलमा अविजित १८ रन बनाए । कप्तान रविन्द्र शाही, निश्चल रावल र दिपेन्द्र रावलले समान १२ रन बनाए ।
विवेक यादव र कुशल मल्लले समान तीन तीन तथा सोमपाल कामीले दुई विकेट लिए ।
त्यसअघि टस हारेर पहिले ब्याटिङ गरेको आर्मीले निर्धारित ५० ओभरमा ५ विकेट गुमाएर २ सय ७९ रन बनायो ।
आर्मीका लागि कप्तान विनोद भण्डारीले १ सय ३२ बलमा १ सय रनको शतकीय ईनिङ खेले । उनले १ सय ३२ बलमा ६ चौका र ३ छक्काको सहयोगमा शतक बनाएका थिए ।
प्रधानमन्त्री कपको ईतिहासमा यो उनको तेस्रो शतक हो । यस अघि २०२१ को प्रधानमन्त्री कपमा उनले गण्डकी प्रदेशविरुद्ध पहिलो तथा यसै संस्करणमा मधेश प्रदेशविरुद्ध शतक प्रहार गरेका थिए ।
यस संस्करण भण्डारीको यो दोस्रो शतक हो । एकै सिजनमा दुई शतक बनाउँने भण्डारी दोस्रा खेलाडी हुन् । गत संस्करणमा नेपाल पुलिसका कप्तान दीपेन्द्रसिंह ऐरीले दुई शतक प्रहार गरेका थिए ।
बसिर अहमदले ९२ बलमा ९८ रनको अर्धशतकीय ईनिङ खेले । उनले १२ चौका र १ छक्का प्रहार गरे । उनीहरुबीचमा छैटौं विकेटका लागि १ सय ६९ रनको साझेदारी भएको हो । यस अघि २०१९ मा कर्णाली प्रदेशविरुद्ध नेपाल पुलिस क्लबका दीलिप नाथ र कुशल भुर्तेलको बीचमा १ सय ४९ रनको साझेदारी भएको थियो ।
भीम सार्कीले ३५ बलमा २५ रन बनाए । कुशल मल्लले १८ बलमा २१ रन बनाए ।
कर्णालीका लागि दीपेन्द्र रावतले दुई तथा प्रकाश जैसी, दिवान पुन र दिनेश अधिकारीले समान एक एक विकेट लिए ।
जितसँगै आर्मीको फाइनल सम्भावना कायमै रहेको छ । हारसँगै कर्णालीको शीर्ष चारमा स्थान बनाउँदै एलिट कप खेल्ने सम्भावना सकिएको छ ।
