काठमाडौं । मलेसियामा आजबाट सुरु एसीसी प्रिमियर कप मा नेपालले हङकङबाट ९४ रनको लक्ष्य पाएको छ ।
प्रतियोगिताको आफ्नो पहिलो खेलमा नेपालविरुद्ध हङकङ ९३ रनमा समेटिएको हो । मलेसियाको क्वालालप्पुरमा रहेको सेलन्गर ट्रफमा टस हारेर पहिले ब्याटिङ गरेको हङकङले निर्धारित २० ओभरमा ८ विकेट गुमाएर ९३ रन बनायो ।
हङकङका लागि कप्तान चेन क्यारीले ३१ बलमा २१ तथा मायाम बिबिले २० बलमा १९ रन बनाए ।
नेपालका लागि पूजा महतो र रुबिना क्षेत्रीले समान दुई दुई तथा कविता जोशी र रुबिना क्षेत्रीले समान एक एक विकेट लिए ।
टी-ट्वान्टी आई मा भएको पछिल्लो पाँच भेटमा नेपाल र हङकङ समान दुई दुई खेलमा विजयी हुँदा एक खेल भने वर्षाका कारण रद्द भएको थियो ।
प्रतियोगितामा १६ राष्ट्रको सहभागीता रहनेछ ।
सहभागी १६ देशलाई चार समूहमा विभाजन गरिएको छ । नेपालको समूहमा हङकङ, भुटान र माल्दिभ्स रहेका छन् ।
दोस्रो खेलमा ११ फेब्रुअरीमा भुटानको सामना गर्ने नेपालले समूह चरणको अन्तिम खेलमा माल्दिभ्सको सामना गर्नेछ । हरेक समूहका शीर्ष दुई टोलीले क्वाटरफाइनलमा स्थान बनाउने छन् । प्रतियोगिताको फाइनल पुग्ने दुई टोलीले एसिया कपमा स्थान बनाउँने छन् ।
