बागमती प्रदेशलाई ५६ रनले पराजित गर्दै प्रदेश नम्बर-१ प्रधानमन्त्री कप महिला राष्ट्रिय टि-ट्वान्टी प्रतियोगिताको सेमीफाइनल प्रवेश गरेको छ। समुह ‘ए’ बाट प्रदेश-१ को साथै लुम्बिनी प्रदेश पनि समान दुई जितको साथ सेमीफाइनल पुगेको छ। कर्णाली र बागमती प्रदेश एक खेल खेल्न बाँकी रहेता पनि सेमीफाइनल रेसबाट बाहिर भएको छ।
फाप्ला क्रिकेट मैदानमा सम्पन्न खेलमा प्रदेश-१ ले दिएको ११५ रनको लक्ष्य पछ्याउने क्रममा बागमतीले २० ओभरमा ८ विकेट क्षेतीमा ५९ रन मात्र बनाउन सक्यो। सुमन खतिवडाले २१ तथा अश्मिना कर्माचार्यले १० रन बनाउनु बाहेक अन्य ब्याटरले दोहोरो अंकमा रन बनाउन सकेनन्।
प्रदेश-१ को बलिंगमा रुबिना क्षेत्री, ज्योति दनवार र अलिशा खडीयाले समान एक विकेट लिए। बागमतीका ६ ब्याटर रन आउट भए।
यस अघि टस जितेर ब्याटिंग गरेको प्रदेश-१ ले निर्धारित २० ओभरमा ५ विकेट क्षेतीमा ११४ रन बनाएको थियो।
प्रदेश-१ को ब्याटिंगमा अप्सरी बेगमले लगातार दोश्रो अर्धशतक बनाउने क्रममा अविजित ५१ रन बनाउने क्रममा ६१ बलमा २ चौका प्रहार गरिन्। यस्तै स्मृति कटुवालले २० तथा सबनम राईले १५ रन बनाईन्। तेश्रो विकेटको लागि अप्सरी र स्मृतिले ५२ रनको तथा पाँचौ विकेटको लागि अप्सरी र सबनमले ४२ रनको साझेदारी गरे।
बागमती प्रदेशको बलिंगमा अस्मिना कर्माचार्य ( ४-०-२३-२ ) र खुसि डंगोलले ( ४-०-२६-२ ) समान दुई विकेट लिए।
प्रतियोगिता अन्तर्गत सोमबार समुह ‘बि’ अन्तर्गतका दुई खेल हुनेछन्। दिनको पहिलो खेलमा बिहान ९ बजे सुदूरपश्चिम प्रदेश र शशस्त्र प्रहरी बल ( एपीएफ ) तथा दोश्रो खेलमा दिनुसो १ बजे प्रदेश-२ र गण्डकी प्रदेश प्रतिस्पर्धा गर्नेछन्।
