काठमाडौं । कप्तान ऋतुराज गायकवाड तथा शिभम दुबेको अर्धशतकको सहयोगमा १७ औं संस्करणको इन्डियन प्रिमियर लिग (आइपिएल) को २९ औं खेलमा चेन्नई सुपर किंग्सले मुम्बई इन्डियन्सलाई जितका लागि २ सय ७ रनको लक्ष्य दिएको छ ।
मुम्बईको घरेलु मैदान वानंखडेमा टस हारेर पहिले ब्याटिङ गरेको चेन्नईले निर्धारित २० ओभरमा ४ विकेट गुमाएर २ सय ६ रन बनायो ।
चेन्नईका लागि ऋतुराज गायकवाड तथा शिभम दुवेले अर्धशतक बनाए । दुवेले ३८ बलमा ६ चौका र २ छक्काको सहयोगमा अविजित ६६ रन बनाए । कप्तान गायकवाडले ४० बलमा ५ चौका र ५ छक्काको सहयोगमा ६९ रन बनाए ।
दुवे र गायकवाडले तेस्रो विकेटका लागि ४५ बलमा ९० रनको महत्वपुर्ण साझेदारी गरे । ओपनर रचिन रविन्द्रले १६ बलमा २ चौका र १ छक्काको सहयोगमा २१ रन बनाए । अर्का ओपनर अजिंका रहाणेले ५ रन मात्र बनाउन सके । ड्यारियल मिचेलले १४ बलमा १७ रन बनाए ।
महेन्द्रसिंह धोनी २० रनमा अविजित रहे ।
मुम्बईका लागि हार्दिक पान्ड्याले दुइ तथा जेरार्ड कोट्जे र श्रेयस गोपालले समान एक एक विकेट लिए ।
