काठमाडौं । नितिशकुमार रेड्डीको अर्धशतकको सहयोगमा सनराइजर्स हैदराबादले पन्जाब किंग्सलाई १ सय ८३ रनको लक्ष्य दिएको छ ।
पन्जाबको घरेलु मैदानमा टस हारेर पहिले ब्याटिङ गरेको पाहुना टोलीले निर्धारित २० ओभरमा ९ विकेट गुमाएर १ सय ८२ रन बनायो ।
हैदराबादका लागि रेड्डिले ३७ बलमा ४ चौका र ५ छक्काको सहयोगमा ६४ रनको अर्धशतकीय ईनिङ खेले । अब्दुल समादले १२ बलमा ५ चौकाको सहयोगमा २५ रन बनाए । छैटौं विकेटका लागि रेड्डि र समादले २० बलमा ५० रनको साझेदारी गरेका थिए ।
ओपनर ट्राभिस हेडले १५ बलमा ४ चौकाको सहयोगमा २१ रन बनाए । शाहबाज अहमदले ७ बलमा १ चौका र १ छक्काको सहयोगमा अविजित १४ रन बनाए । अभिषेक शर्माले १६ तथा राहुल त्रिपाटीले ११ रन बनाए ।
पन्जाबका लागि अर्शदिप सिंहले चार तथा हर्षल पटेल र साम करनले समान दुई दुई तथा कागिसो रबाडाले एक विकेट लिए ।
जारी सिजनको आइपिएलमा हैदराबादले ४ खेल खेलेकोमा २ मा जित र २ मा हार व्यहोरेरे अंक तालिकाको पाँचौ स्थानमा छ । पहिलो खेलमा कोलकाता नाईट राईडर्ससँग पराजित हैदराबादले दोस्रो खेलमा मुम्बई इन्डियन्सलाई पराजित गरेको थियो ।
तेस्रो खेलमा गुजरात टाईटन्ससँग पराजित हैदराबादले चौथो खेलमा चेन्नई सुपर किंग्सलाई पराजित गरेको थियो ।
उता,पन्जाब किंग्सले पनि ४ खेलमा २ जित र २ हार व्यहोरेको छ ।
पञ्जाव किंग्सले पहिलो खेलमा दिल्ली क्यापिटल्सलाई पराजित गरेको थियो । दोस्रो खेलमा रोयल च्यालेन्जर्स बैंगलुरु र तेस्रो खेलमा लखनाउ सुपर जाइन्ट्ससँग पराजित भएको थियो ।
चौथो खेलमा गुजरात टाईटन्सलाई पराजित गरेको थियो । आइपीएल ईतिहासमा यि दुई टोली हालसम्म २१ पटक खेलेका छन् । १४ खेलमा हैदराबाद विजयी हुँदा ७ खेलमा पन्जाब विजयी भएको छ ।
चार खेलमा अपराजित राजस्थान रोयल्स अंक तालिकाको शीर्ष स्थानमा छ । यस लिगमा १० टोलीको सहभागीता रहेको छ ।