( फिचर फोटो – फाइल )
नेपालका तीन महिला नेत्रहीन क्रिकेट खेलाडी ‘ज्योति केसी नेत्रहीन महिला क्रिकेट प्रतिभा पुरस्कार’ बाट सम्मानित भएका छन् ।
नेपाल नेत्रहीन क्रिकेट संघले १५ औं वार्षिकोत्सवको अवसरमा बुधबार तीन खेलाडीलाई प्रतिभा पुरस्कारबाट सम्मान गरेको हो । संघले हरेक वर्षको साउन २२ गते वार्षिकोत्सव मनाउने गर्छ।
सम्मानित हुने खेलाडीमा बी–३ समूहतर्फ राष्ट्रिय टोलीका कप्तान समेत रहेकी भगवती भट्टराई, बी–२ बाट मनकेशी चौधरी र बी–१ बाट आशा रेग्मी रहेकी छिन् ।
उनीहरुलाई प्रतिव्यक्ति ५/५ हजार र कदरपत्रबाट सम्मान गरिएको संघले जनाएको छ ।
कप्तान भगवती विगत १४ वर्षबाट नेत्रहिन क्रिकेटमा संग्लग रहेकी छिन् । सन् २०१४ मा बेलायत र २०१९ मा पाकिस्तानसँगको सिरिजमा कप्तानी गर्दै नेपाललाई जित दिलाएकी थिइन् ।
मनकेशी उत्कृष्ट ब्याटिङका लागि चर्चित छिन् । उनी बेलायत र पाकिस्तान विरुद्धको सिरिजमा प्लेयर अफ दि सिरिज बनेकी थिइन् ।
आशा पनि १४ वर्षबाट नेत्रहीन क्रिकेटमा रहेकी छिन् । सन् २०१९ मा पाकिस्तान विरुद्धको सिरिजमा उनले उत्कृष्ट प्रदर्शन गरेकी थिइन् ।
