अस्ट्रेलियामा जारि बिग ब्यास लिग अन्तर्गत मंगलबार सम्पन्न खेलमा सिड्नी थन्डर्सले पर्थ स्करचर्सलाई ७ विकेटले सहजै पराजित गरेको छ।
मनुका ओभल, क्यानबेरामा सम्पन्न खेलमा पर्थले दिएको १५३ रनको लक्ष्य सिड्नीले ३ विकेट गुमाएर १९.३ ओभरमा पुरा गर्यो।
सिड्नीको जितमा कप्तान कलुम फर्गुसनले सर्वाधिक ६१ रन योगदान दिए जुन क्रममा ५३ बलमा ७ चौका र १ छक्का प्रहार गरे।
ओपनर एलेक्स हेल्स खाता नखोली पहिलो ओभरमा आउट भएपछि ब्याटिंग गर्न आएका फर्गुसनले अविजित रहँदै टिमलाई जित दिलाए। उस्मान ख्वाजा २१ रन बनाएर आउट भएपछि फर्गुसनले तेश्रो विकेटको लागि ओलिभर डेभिससंग ७५ रनको साझेदारी गरे। ३६ रन बनाएका डेभिड १४ औं ओभरमा आउट भएपछि उनले बेन कटिंगसंग अविजित ४७ रनको साझेदारी गर्दै टिमलाई जितसम्म पुर्याए। कटिंगले अविजित २९ रन बनाए।
पर्थको बलिंगमा जेसन बेरेनडर्फ , आरोन हार्डी र फवाद एहमदले समान १ विकेट लिए।
ONE-HAND SIX! #BBL10 pic.twitter.com/WARsrHvWB1
— KFC Big Bash League (@BBL) December 22, 2020
यस अघि टस हारेर ब्याटिंग गरेको पर्थले २० ओभरमा ५ विकेट नोक्सानीमा १५२ रन बनाएको थियो।
पर्थको लागि मिचेल मार्शले सर्वाधिक ५२ रन , क्यामरन ब्यानक्रफ्टले ३४, कोलिन मुनरोले २५ तथा एस्टन टर्नरले २३ रन बनाए।
३६ रनमै ३ विकेट गुमाएको पर्थलाई चौथो नम्बरमा आएका मार्शले सम्हालेका थिए। मार्शले छैठौं विकेटको लागि ब्यानक्रफ्टसंग ६१ रनको महत्वपूर्ण साझेदारी गरे।
सिड्नीको बलिंगमा ड्यानीयल स्याम्स, नाथन म्याकएन्ड्रु, तन्भिर सांघा र बेन कटिंगले समान १ विकेट लिए।
जितपछि सिड्नी अंकतालिकामा ८ अंक सहित तेश्रो स्थानमा रहेको छ भने पर्थ २ अंक सहित सातौँ स्थानमा रहेको छ। ११ अंक सहित होबार्ट पहिलो स्थानमा रहेको छ।