दाङको लमहीमा शनिवार सुरु भएको प्रधानमन्त्री कप महिला टि-२० राष्ट्रिय प्रतियोगिता अन्तर्गत आइतबार पनि समुह ‘ए’ अन्तर्गत दुई खेलहरु हुँदैछन्।
दिनको पहिलो खेलमा ९ बजे लुम्बिनी प्रदेश र कर्णाली प्रदेश प्रतिस्पर्धा गर्नेछन् भने दोश्रो खेल दिउसो १ बजे एपीएफ र प्रदेश-२ ले प्रतिस्पर्धा गर्नेछन्। दुवै खेल लमही क्रिकेट मैदानमा खेलिनेछन्।
आज एपीएफ र लुम्बिनी विजयी भएको खण्डमा दुवै टिम २ जितको साथ सेमीफाइनल पुग्नेछ। आज पराजित भएको खण्डमा कर्णाली र प्रदेश-२ प्रतियोगिताबाट १ खेल बाँकि रहँदै बाहिर हुनेछ। त्यसैले कर्णाली र प्रदेश-२ को लागि आज गर या मर को अवस्था रहेको छ।
प्रतियोगिता अन्तर्गत हिजोको खेलहरुमा लुम्बिनीले प्रदेश-२ लाई ९ विकेटले तथा एपीएफले कर्णालीलाई २०४ रनको विशाल अन्तरले पराजित गरेको थियो। २०४ रनको जित नेपाली महिला घरेलु टि-२० क्रिकेटकै सबैभन्दा फराकिलो जित हो।
राष्ट्रिय खेलकुद परिषदको कार्यक्रम अन्तर्गत नेपाल क्रिकेट संघले आयोजना गरेको प्रतियोगितामा विभागीय टोलि एपीएफ र ७ वटा प्रदेश गरि कुल ८ टिम सहभागी रहेका छन्। समुह ‘ए’ मा लुम्बिनी, कर्णाली, एपीएफ र प्रदेश-२ रहेका छन् भने समुह ‘बि’ मा प्रदेश-१ , बागमती प्रदेश, गण्डकी प्रदेश र सुदुर पश्चिम प्रदेश रहेका छन्। समुह चरणमा सबै टिमले एक अर्का बिरुद्ध १/१ खेल खेलिसकेपछि अंकतालिकामा शिर्ष हुने २/२ टिम सेमीफाइनल प्रवेश गर्नेछन्।
प्रतियोगिताको विजेता टिमले ५ लाख रुपैयाँ तथा उपविजेताले ३ लाख रुपैयाँ प्राप्त गर्नेछन्। यस्तै सेमीफाइनलमा पराजित हुने दुई टिमले २५ हजार रुपैयाँ प्राप्त गर्नेछन्। प्रतियोगिताको उत्कृस्ट खेलाडीले २१ हजार तथा उत्कृस्ट ब्याट्सम्यान र बलरले समान १० हजार रुपैयाँ प्राप्त गर्नेछन्।
