काठमाडौं । मलेसियामा जारी एसीसी महिला प्रिमियर कपमा नेपालले आज (मंगलबार) माल्दिभ्सको सामना गर्दै छ ।
खेल नेपाली समय अनुसार बिहान सवा ११ बजेदेखि मलेसियाको वाईएसडी ओभलमा हुदै छ ।
नेपालले लगातार दुई खेलमा जित हासिल गरेर प्रतियोगिताको क्वाटरफाइनलमा आफ्नो स्थान सुरक्षित गरिसकेको छ । आजको खेलमा माल्भ्सिलाई पराजित गर्दै नेपाल आफ्नो समूहको विजेता बन्दै क्वाटरफाइनलमा प्रवेश गर्न चाहन्छ ।
समूह विजेता बनेमा नेपालले क्वाटरफाइनलमा समूह ए को उपविजेतासँग खेल्ने छ । यस अघिका दुवै खेलमा पराजित माल्दिभ्स भने प्रतियोगिताबाट बाहिरिएको छ ।
नेपालले यसअघि पहिलो खेलमा हङकङलाई तथा दोस्रो खेलमा भुटानमाथि समान आठ आठ विकेटको जित हासिल गरेको थियो ।
हरेक समूहका शीर्ष दुई टोलीले क्वाटरफाइनलमा स्थान बनाउने छन् । प्रतियोगिताको फाइनल पुग्ने दुई टोलीले एसिया कपमा स्थान बनाउँने छन् ।
नेपाली टोली
ईन्दु बर्मा(कप्तान), बिन्दु रावल, रुबिना क्षेत्री, सिता रानामगर, काजोल श्रेष्ठ, पूजा महतो, संगिता राई, अप्सरी बेगम, कविता जोशी, कविता कुँवर, सम्झना खड्का, रोमा थापा, डलि भट्ट, अस्मिना कर्माचार्य
