काठमाडौं । स्कटल्यान्ड ओमानलाई पराजित गर्दै वेस्ट इन्डिज र अमेरिकामा जारी नवौं संस्करणको टी-२० विश्वकपमा आफ्नो समूहको शीर्ष स्थानमा उक्लिएको छ ।
स्कटल्यान्डले ओमानलाई ७ विकेटको फराकिलो अन्तरले पराजित गर्यो ।
ओमानले दिएको १ सय ५१ रनको लक्ष्य स्कटल्यान्डले १३ दशमलब १ ओभरमा ३ विकेट मात्र गुमाएर पूरा गर्यो ।
स्कटल्यान्डको जितमा ब्रेन्डन म्याकमुलनले ३१ बलमा अविजित ६१ रनको अर्धशतकीय ईनिङ खेले । ओपनर जर्ज मुन्सेले २० बलमा ४१ तथा माइकल जोन्सले १३ बलमा १६ रन बनाए ।
ओमानका लागि अकिव इल्यास, बिलाल खान र मेहरान खानले समान एक एक विकेट लिए ।
त्यसअघि टस जितेर पहिले ब्याटिङ गरेको ओमानले २० ओभरमा ७ विकेट गुमाएर १ सय ५० रन बनाएको थियो ।
ओमानका लागि प्रतिक अथाभालले ४० बलमा ५४ तथा आयान खानले ३९ बलमा ४१ रन बनाए ।
स्कटल्यान्डका लागि सफियान सरिफले दुई तथा मार्क वाट, क्रिस शोल र क्रिस ग्रेभ्सले समान एक एक विकेट लिए ।
तीन खेलमा पाँच अंकका साथ स्कटल्यान्ड समूह बी को शीर्ष स्थानमा उक्लिएको छ ।
