काठमाडौं । दक्षिण अफ्रिकाले अमेरिका र वेस्ट इन्डिजमा जारी रहेको नवौं संस्करणको टी-२० विश्वकपमा नेपाललाई १ सय १६ रनको लक्ष्य दिएको छ ।
वेस्ट इन्डिजको सेन्ट भिन्सेन्टमा टस हारेर पहिले ब्याटिङ गरेको दक्षिण अफ्रिकाले २० ओभरमा ७ विकेट गुमाएर १ सय १५ रन बनायो ।
दक्षिण अफ्रिकाका लागि रिजा हेन्ड्रिक्सले ४९ बलमा ४३ तथा ट्रिस्टन स्टब्सले १८ बलमा २७ रन बनाए । कप्तान ऐडन मारकमले २२ बलमा १५ तथा क्विटन डि ककले १० रन बनाए ।
नेपालका लागि कुशल भुर्तेलले चार तथा दीपेन्द्रसिंह ऐरीले तीन विकेट लिए ।
नेपाल दक्षिण अफ्रिकाविरुद्ध जितका साथ अर्को चरण (सुपर एट) प्रवेशको सम्भावनालाई कायमै राख्न चाहन्छ । नेपाललाई सुपर एटमा स्थान बनाउँन यो खेल साथै सोमबार हुने बंगलादेशसँगको खेल पनि जित्नु पर्ने हुन्छ ।
यता, यस संस्करणको विश्वकपमा तीन खेलमा अपराजित रहेर सुपर एटमा प्रवेश गरिसकेको दक्षिण अफ्रिका नेपाललाई पराजित गरेर समूह चरणको अपराजित यात्रा कायम राख्न चाहन्छ ।