काठमाडौं । इंग्ल्यान्डलाई हराउँदै भारतले टी-२० विश्वकपको तेस्रो पटक फाइनलमा स्थान बनाउँन सफल भएको छ ।
वेस्ट इन्डिजको गयानामा भएको नवौं विश्वकपको दोस्रो सेमिफाइनल खेलमा भारत ६८ रनको फराकिलो अन्तरले विजयी भएको हो ।
भारतले दिएको १ सय ७२ रनको लक्ष्य पछ्याएको डिफेन्डिङ च्याम्पियन इंग्ल्यान्डले १६ दशमलब ४ ओभरमा अल आउट हुदै १ सय ३ रन मात्र बनाउन सक्यो ।
इंग्ल्यान्डका लागि ह्यारी ब्रुकले १९ बलमा २५ तथा कप्तान जस बटलरले १५ बलमा २३ रन बनाए । जोफ्रा आर्चरले १५ बलमा २१ तथा लियम लिविगंस्टनले १६ बलमा ११ रन बनाए । इंग्ल्यान्डका अन्य ब्याटरले दोहोरो अंकमा रन बनाउँन सकेनन् ।
भारतका लागि अक्षर पटेल र कुलदिप यादवले समान तीन तीन तथा जसप्रित बुमराहले दुई विकेट लिए ।
त्यसअघि टस हारेर पहिले ब्याटिङ गरेको भारतले निर्धारित २० ओभरमा ७ विकेट गुमाएर १ सय ७१ रन बनाएको थियो ।
भारतका लागि कप्तान रोहित शर्माले ३९ बलमा ६ चौका र २ छक्काको सहयोगमा ५७ रनको अर्धशतकीय ईनिङ खेले । सुर्यकुमार यादवले ३६ बलमा ४ चौका र २ छक्काको सहयोगमा ४७ रन बनाए । तेस्रो विकेटका लागि शर्मा र यादवले ५० बलमा ७३ रनको साझेदारी गरे ।
हार्दिक पान्ड्याले १३ बलमा २३ तथा रविन्द्र जडेजाले ९ बलमा अविजित १७ रन बनाए ।
इंग्ल्यान्डका लागि क्रिस जोर्डनले तीन तथा जोफ्रा आर्चर, रिच टोप्ले, साम करन र आदिल राशिदले समान एक एक विकेट लिए ।
अपराजित रुपमा भारत तेस्रो पटक फाइनल पुगेको हो । सन् २००७ मा भएको पहिलो संस्करणको च्याम्पियन भारत २०१४ मा फाइनल पुगेको थियो ।
यस खेलको विजेता भारतले पहिलो सेमिफाइनलको विजेता दक्षिण अफ्रिकासँग शनिबार उपाधीका लागि खेल्नेछ ।
