काठमाडौं । विश्वकप लिग टु अन्तर्गतको क्यानडामा हुने त्रिकोणात्मक ओडिआई सिरिजको पहिलो खेलमा नेपाल घरेलु टोलीसँग खेल्दैछ । नेपाल र क्यानडाबीचको खेल नेपाली समय अनुसार सोमबार बेलुका ७ः४५ मा क्यानडाको किंग्स सिटी क्रिकेट मैदानमा हुनेछ ।
त्रिकोणात्मक सिरिजमा नेपाल र क्यानडाको अलावा ओमानको पनि सहभागीता रहनेछ । नेपाल यसपटकको विश्वकप लिग टुको पहिलो देश बाहिरको सिरिजमा रहेको छ । जितका साथ सिरिजको सुरुवात गर्ने योजनामा नेपाल रहेको छ । यसका लागि नेपाल बलियो प्लेईङ११ मैदान उतार्ने योजनामा रहनेछ ।
नेपालको ओपनर जोडिमा यसअघि झै कुशल भुर्तेल र आसिफ शेखको सम्भावना रहेको छ । कुशलले नेपालले खेलेको पछिल्लो ओडिआईमा अर्धशतक प्रहार गरेका थिए । सो खेलमा नेपालका अन्य ब्याटर नचल्दा कुशलले ९३ बलमा ६६ रन बनाएका थिए । अर्का ओपनरमा आसिफ शेख रहने सम्भावना रहेको छ । विकेटकिपरको भुमिकामा समेत रहने आसिफको देश बाहिरको प्रदर्शन राम्रो रहेको छ ।
तेस्रो नम्बरको ब्याटरमा भीम सार्कीको सम्भावना प्रवल छ । क्रिकेट करियरको छोटो समयमा नै राम्रो छाप छोड्न सफल भीमको तेस्रो नम्बरको प्रदर्शन तारिफयोग्य रहेको छ । चौथो नम्बरमा कप्तान रोहितकुमार पौडेलको सम्भावना रहेको छ । आवश्यकता अनुसार आफ्नो ब्याटिङ स्थान हेरफेर गर्ने कप्तान रोहितको चौथो नम्बरमा प्रदर्शन राम्रो रहेको छ । पाँचौ नम्बरमा अलराउन्डर दीपेन्द्रसिंह ऐरी रहने सम्भावना छ । ऐरीको ओडिआईमा ब्याटिङबाट खास प्रदर्शन नआउँदा उनको बलिङ र फिल्डिङ क्षमता तारिफयोग्य रहेको छ ।
छैटौं नम्बरमा नेपाली ओडिआईका भरपर्दा खेलाडी आरिफ शेखको सम्भावना छ । आरिफलाई मध्येक्रम राम्रोसँग सम्हाल्न सक्ने खेलाडीको रुपमा हेरिदै आएको छ । सातौं नम्बरमा अनिल शाह रहने सम्भावना छ । अनिल यस खेलमा फिनिसरको भुमिकामा खेल्ने सम्भावना रहेको छ । उनको हिटिङ क्षमतालाई हेर्दै शाहलाई यस खेलमा फिनिसरको भुमिकामा देख्न सकिन्छ । आठौं नम्बरमा गुलसन झाको सम्भावना छ । झा तीव्रगतीको बलिङका साथै तल्लो क्रमका राम्रा ब्याटरका रुपमा समेत रहेका छन् ।
नवौं र दर्शौ नम्बरमा सोमपाल कामी र करण केसी रहने सम्भावना छ । तीव्रगतीका बलर दुवै तल्लो क्रमको ब्याटिङमा समेत राम्रो योगदान दिन सक्नेछन् । एघार नम्बरमा लेगस्पिनर सन्दीप लामिछानेको सम्भावना छ । सन्दीपले यस खेलमा मौका पाएमा करिब १३ महिना पछि नेपालको ओडिआई टिमबाट खेल्नेछन् ।
नेपालको सम्भावित प्लेईङ-११
कुशल भुर्तेल, आसिफ शेख, भीम सार्की, रोहित पौडेल(कप्तान), दीपेन्द्रसिंह ऐरी, आरिफ शेख, अनिल शाह, गुलसन झा, सोमपाल कामी, करण केसी र सन्दीप लामिछाने
