- विकेटनेपाल-१८ कार्तिक, आइतवार (पोखरा)
पारस खड्काको कप्तानीमा रहेको चितवन राइनोज पोखरा प्रिमियर लिगको फाइनल प्रवेश गरेको छ। चितवनले उपाधिका लागि पोखरा पल्टनको सामना गर्नेछ। राउण्ड रोबिन लिगबाट पोखरा अंक तालिकाको शिर्ष स्थानमा रहँदै सोझै फाइनल प्रवेश गरेको थियो।
फाइनलसम्मको यात्रा तय गर्ने क्रममा चितवनले काठमाण्डौले दिएको ९५ रनको लक्ष्या १८.२ ओभरमा ४ विकेट गुमाउंदै पुरा गर्यो। काठमाण्डौलाई ६ विकेटले हराउन चितवनका स्मित पटेलले ३८ रन बनाए।
सुरुवातामा लगातार विकेट गुमाएपछि सम्हालिएर ब्याटिंग गर्ने क्रममा स्मितले ४३ बलको सामना गर्दै ३ चौका सहित ३८ रन जोडे। यस्तै आरिफ शेखले अविजित २० रनको योगदान गर्दा ३२ बलमा १ चौका प्रहार गरे।
यसअघि चितवनका हरि शंकर शाह २६, अनिल कुमार साह १ र पारस खड्का २ रन बनाएर आउट भएका थिए।
काठमाण्डौको बलिङ्गमा सुशान भारीले सर्वाधिक ३ विकेट लिएपनि टोलीलाई जित दिलाउन सकेनन्। आफ्नो ४ ओभरको स्पेलमा भारीले १८ रन खर्चिएर अनिल, पारस र स्मितलाई पभेलियन फर्काए।
यसअघि पोखरा रंगशालाको क्रिकेट मैदानमा आइतवार बिहान टस जितेर ब्याटिंगमा उत्रिएको काठमाण्डौले १९.३ ओभरमा ९४ रन जोड्दा सबै विकेट गुमाएको थियो। सन्नी पटेल, भुबन कार्की र स्मित पटेलको सानदार बलिङ्ग अगाडी काठमाण्डौका ब्याट्समेनहरुको सिप चल्न सकेन।
काठमाण्डौको इनिंगलाई तहस नहस पार्ने क्रममा सन्नी पटेलले आफ्नो व्यक्तिगत पहिलो तथा इनिंगको दोस्रो ओभरमा नै तिन विकेट चट्काएका थिए। सन्नीको सो ओभरमा काठमाण्डौले अमित श्रेष्ठ, पवन सर्राफ र गौरभ तोमरलाई गुमाएको थियो।
त्यसपश्चात इनिंग अगि बढाउने क्रममा कप्तान ज्ञानेन्द्र मल्लले सम्हालिएर ब्याटिंग गर्ने प्रयास गरेपनि ३० रन बाहेक थप स्कोर जोड्न पुन: विफल रहे। ३५ बल खेल्दै मल्ल २ चौका सहित ३० रनको स्कोरमा भूबन कार्कीबाट बोल्ड भए।
यस्तै ओपनर जयकिशन कोल्सावालाले २५ रन जोड्न बाहेक रोयल्सका अन्य ब्याट्समेनले दोहोरो अंकमा रन जोड्न सकेनन्।
प्रतियोगितामा सानदार प्रदर्शन जारि राख्ने क्रममा सन्नी पटेलले ४ ओभरमा मात्र ९ रन जोडेर ३ विकेट चट्काए। काठमाण्डौका गौरभ तोमर, पवन सर्राफ र अमित श्रेष्ठ सन्नीको शिकार बने।
यस्तै स्मित पटेल र भूबन कार्कीको नाममा समेत समान २-२ विकेट रह्यो। भूबनले काठमाण्डौका ज्ञानेन्द्र मल्ल र बसन्त रेग्मीलाई आउट गर्दा स्मितले भने कोल्सावाला र आदील खानलाई आउट गरेका थिए।
