काठमाडौं । जारी १७ औं संस्करणको इन्डियन प्रिमियर लिग(आइपीएल)मा राजस्थान रोयल्सले लगातार चौथो जित निकाल्दै शीर्ष चारमा रहदै प्लेअफमा स्थान बनाउने सम्भावना बलियो बनाएको छ ।
लखनाउको घरेलु मैदानमा लगातार चौथो तथा समग्रमा आठौं जित निकाल्नेक्रममा राजस्थानले लखनाउ सुपर जायन्ट्सलाई ७ विकेटले पराजित गर्यो ।
लखनाउले दिएको १ सय ९७ रनको लक्ष्य राजस्थानले १९ ओभरको अन्तिम बलमा ३ विकेट गुमाएर पूरा गर्यो ।
राजस्थानका लागि कप्तान सन्जु सामसन र धुव्र जुरेलले अर्धशतकीय ईनिङ खेले । कप्तान सामसनले ३३ बलमा ७ चौका र ४ छक्काको सहयोगमा ७१ रन बनाए । जुरेलले ३४ बलमा ५ चौका र २ छक्काको सहयोगमा ५२ रन बनाए । सामसन र जुरेलले चौथो विकेटका लागि ६२ बलमा अविजित १ सय २१ रनको विजयी साझेदारी गरे ।
ओपनर जोस बटलरले १८ बलमा ४ चौका र १ छक्काको सहयोगमा ३४ रन बनाए । अर्का ओपनर यशस्वी जैसवालले १८ बलमा ३ चौका र १ छक्काको सहयोगमा २४ रन बनाए ।
लखनाउका लागि यश ठाकुर, मार्कस स्टोईनेस र अमित मिश्राले समान एक एक विकेट लिए ।
त्यसअघि टस हारेर पहिले ब्याटिङ गरेको लखनाउले निर्धारित २० ओभरमा ५ विकेट गुमाएर १ सय ९६ रन बनाएको थियो ।
लखनाउका लागि कप्तान केएल राहुल र दिपक होडाले अर्धशतकीय ईनिङ खेले पनि टोलीलाई जित दिलाउन सकेनन् । कप्तान राहुलले ४८ बलमा ८ चौका र २ छक्काको सहयोगमा ७६ रन बनाए । होडाले ३१ बलमा ७ चौकाको सहयोगमा ५० रन बनाए ।
आयुष बदोनीले १३ बलमा अविजित १८ तथा कुर्नाल पान्ड्याले ११ बलमा अविजित १५ रन बनाए ।
राजस्थानका लागि सन्दीप शर्माले दुई तथा ट्रेन्ट बोल्ट, रविचन्द्रन आश्विन र आबेश खानले समान एक एक विकेट लिए ।
नवौं खेलमा आठौं जित हात पारेको राजस्थान शीर्ष स्थानमा कायमै छ । नवौं खेलमा चौथो हार व्यहोरेको लखनाउ चौथो स्थानमा छ ।