काठमाडौं । ओपनर ट्राभिस हेडको शतक सहयोगमा अस्ट्रेलियाले पहिलो ओडिआई खेलमा इंग्ल्यान्डलाई सहज रुपमा पराजित गरेको छ । अस्ट्रेलिया ५ ओडिआई खेलको लागि इंग्ल्यान्ड भ्रमणमा रहेको छ । पहिलो खेलमा जितसँगै भ्रमणकारी टोलीले ५ खेलको सिरिजमा १-० को अग्रता बनाएको छ ।
घरेलु टोलीले दिएको ३ सय १६ रनको लक्ष्य पाहुना टोलीले ४४ ओभरमा ३ विकेट गुमाएर पूरा गर्यो । पाहुना टोलीलाई जित दिलाउन ओपनर हेडले नट आउट रहँदै सर्वाधिक १ सय ५४ रन बनाए । उनले १ सय २९ बलमा २० चौका र ५ छक्का प्रहार गरेका थिए । मार्नुस लाबुस्सेनले ६१ बलमा नट आउट ७७ रन बनाए ।
स्टिभ स्मिथ र क्यामरुन ग्रीनले समान ३२ रन जोड्दा अर्का ओपनर तथा कप्तान मिचेल मार्शले १० बनाए । घरेलु टोलीका लागि ज्याकोव बेथहेल, लियम लिबिगंस्टोन र म्याथ्यु पोटले समान १ विकेट लिए । त्यसअघि टस जितेर पहिले ब्याटिङ गरेको घरेलु टोली ४९.४ ओभरमा अल आउट हुदै ३ सय १५ रन मात्र बनाएको थियो ।
टोलीका लागि ओपनर बेन डुकेटले सर्वाधिक ९५ रन जोडे । उनले ९१ बलमा ११ चौका प्रहार गरेका थिए । विल ज्याक्सले ६२, कप्तान ह्यारी ब्रुकले ३९, ज्याकोब बेथहेलले ३५ तथा जेमी स्मिथले २३ रन जोडेका थिए ।
पाहुना टोलीका लागि एडम जाम्पा र मार्नुस लाबुस्सेनले समान ३, ट्राभिस हेडले २ तथा बेन ड्वारसुइस र म्याथ्यु शर्टले समान १ विकेट लिए । दुई टोलीबीचको दोस्रो ओडिआई खेल शनिवार हुनेछ ।
