काठमाडौं । टी-२० विश्वकपको तयारीका लागि अमेरिकामा रहेको नेपाली टोलीले पहिलो वार्मअप खेलमा क्यानडासँग पराजित भएको छ ।
अमेरिकाको ग्रान्ड प्रेरी स्टेडियममा भएको खेलमा नेपाल ६३ रनले पराजित भएको हो ।
क्यानडाले दिएको १ सय ८४ रनको लक्ष्य पछ्याएको नेपाल १९ दशमलब ३ ओभरमा १ सय २० रनमा अल आउट भयो ।
नेपालका लागि कुशल मल्लले ३० बलमा २ चौका र २ छक्काको सहयोगमा ३७ रन बनाए । अनिल शाहले २४ तथा आसिफ शेखले २२ रन बनाए । कुशल भुर्तेलले १६ बलमा १० रन बनाउँदा अन्य ब्याटरले दोहोरो अंकमा रन बनाउँन सकेनन् ।
क्यानडाका लागि डिलोन ह्यालिगंले ४ तथा साद वीन जाफर र गिरिमी ग्रोडनले समान २/२ विकेट लिए ।
त्यसअघि टस हारेर पहिले ब्याटिङ गरेको क्यानडाले २० ओभरमा ७ विकेट गुमाएर १ सय ८३ रन बनाएको थियो ।
क्यानडाका लागि निकोलस किर्तनले ३९ बलमा ४ चौका र २ छक्काको सहयोगमा ५२ रनको अर्धशतकीय ईनिङ खेले । रविन्द्रपाल सिंहले १७ बलमा १ चौका र ४ छक्काको सहयोगमा अविजित ४१ रन बनाए । नवनित धालीवालले २७ बलमा ३२ तथा प्रगत सिंहले १० बलमा १३ रन बनाए ।
नेपालका लागि अभिनास बोहराले २ तथा करण केसी, सोमपाल कामी, गुलसन झा, सागर ढकाल र ललित राजवंशीले समान १/१ विकेट लिए ।
नेपालले दोस्रो वार्मअप खेल पनि यही मैदानमा बिहीबार अमेरिकासँग खेल्नेछ । यो त्यही स्टेडियम हो जहाँ नेपालले विश्वकपको आफ्नो पहिलो खेल खेल्दैछ । विश्वकपको खेल खेल्ने मैदानमा नै दुवै वार्मअप खेल खेल्न पाउनु नेपालका लागि फाइदाजनक हुनसक्छ ।
नेपालले वार्मअप खेल खेल्न लागेको अमेरिका र क्यानडा समूह ए मा रहेका छन् । अमेरिका र क्यानडाका अलावा समूह ए मा भारत, पाकिस्तान र आयरल्यान्ड रहेका छन् । अमेरिका र क्यानडाबीचको खेलबाट नै यस संस्करणको विश्वकपको सुरुआत हुनेछ ।
