पाँच पोखरी टि-२० जिल्ला स्तरीय क्रिकेट प्रतियोगिता अन्तर्गत सिरुवारीले इन्द्रावती गाउँपालिकाविरुद्ध ११ रनको सानदार जित निकालेको छ ।
मुलपानी क्रिकेट मैदानमा सम्पन्न खेलमा ७९ रनको सामान्य विजयी लक्ष्य पछ्याएको इन्द्रावती १८.३ ओभरमा ६७ रनमा अल आउट भयो । उसका लागि प्रकाश सापकोटाले ४३ बलमा सर्वाधिक १२ रन बनाए । यस्तै, प्रदीप सापकोटा ८, अरुण चौलागाईं ७ र विवेक सापकोटा ५ रनमा आउट भए ।
सिरुवारीको बलिङतर्फ सुशान चौलागाईंले ३ तथा रोशन श्रेष्ठ र सुदीप दुलालले २-२ विकेट लिए ।
यसअघि खेलमा टस जितेर पहिले ब्याटिङ रोजेको सिरुवारीले १५.१ ओभरमा सम्पुर्ण विकेट गुमाएर ७८ रनमात्र बनाउन सक्यो । उसका लागि रिन्जिन लामाले २७ बलमा ४ चौकासहित सर्वाधिक २६ रन बनाए । यस्तै, मनोज देउजा ११ तथा उमंग धिताल र रोशन श्रेष्ठले समान ९ रनको योगदान दिए ।
इन्द्रावतीको बलिङतर्फ सबिन कार्कीले ३.१ ओभरमा १ मेडनसहित ११ रन खर्चेर ४ विकेट लिए । यस्तै, राजेश र कपिल चौलागाईंले २-२ विकेट लिए ।
