काठमाडौं । नामिबियामाथि स्कटल्यान्डले विश्वकप लिग टू सिरिज अन्तर्गतको खेलमा सहज जित हात पारेको छ ।
लिग टू सिरिज अन्तर्गत स्कटल्यान्डमा जारी ओमान, नामिबिया र घरेलु टोलीबीचको त्रिकोणात्मक सिरिजको छैटौ खेल स्कटल्यान्डले १३८ रनको फराकिलो जित हात पारेको हो । स्कटल्यान्डले दिएको ३ सय २ रनको लक्ष्य पछ्याएको नामिबिया ४० दशमलब १ ओभरमा १ सय ६३ रन बनाउँदै अल आउट भयो ।
नामिबियाका लागि कप्तान ग्रेहार्ड इरास्मसले ७३ बलमा ५३ रन बनाए । उनले ६ चौका प्रहार गरेका थिए । जेन ग्रिनले २८ तथा मलान क्रुजरले २७ रन बनाए । स्कटल्यान्डका लागि ब्राड करी र गाभिन मेनले समान तीन तीन तथा माइकल लिग्स र ब्रेन्डन म्याकमुलनले समान दुई दुई विकेट लिए ।
त्यसअघि टस हारेर पहिले ब्याटिङ गरेको स्कटल्यान्डले ५० ओभरमा ६ विकेट गुमाएर ३०१ रन बनाएको थियो ।
स्कटल्यान्डका लागि माइकल इंग्लिसले १२२ बलमा १०७ रन बनाए । डेब्यु खेलमा शतक बनाउँने क्रममा इंग्लिसले ९ चौका र २ छक्का प्रहार गरे ।
कप्तान रिची बेरिङ्टनले ८१ बलमा ८९ रन बनाए । बेरिङ्टनले ११ चौका र १ छक्का प्रहार गरे ।
क्रिस ग्रेभ्सले अविजित ३१ तथा मार्क वाटले अविजित १० रन बनाए ।
नामिबियाका लागि शौन फौचेले तीन तथा बेन सिङ्कन्गो र टांगेनी लुंगामेनी समान एक विकेट लिए ।
जितसँगै आठ टोली सहभागी लिग टू को अंक तालिकामा स्कटल्यान्ड नौ अंकका साथ शीर्ष स्थानमा उक्लिएको छ । लिग टू अन्तर्गत आठ अंकका साथ नामिबिया तेस्रो स्थानमा झरेको छ । अंकतालिकामा दुई अंकका साथ नेपाल छैटौं स्थानमा छ ।
लिग टूको शीर्ष चार टोलीले २०२७ हुने ओडिआई विश्वकप छनोटमा स्थान बनाउँने छन् ।
