काठमाडौं । विभागीय टोली नेपाल पुलिस क्लबले त्रिभुवन आर्मी क्लबलाई हराउँदै प्रधानमन्त्री कप राष्ट्रिय क्रिकेट प्रतियोगिताको च्याम्पियन भएको छ ।
पुलिसले अपराजित रहँदै उपाधी जितेको हो । टियु मैदानमा भएकाे खेलमा पुलिसले आर्मीलाइ छ विकेटले पराजित गरेकाे हो । पुलिसले लिग चरणका सबै खेल जित्दै फाइनलमा स्थान बनाएको थियो ।
योसँगै पुलिसले तेस्रो पटक उपाधी जितेको हो । २०१७ मा यि दुवै टोलीले खेलेका थिए । तर, वर्षाको कारण पूरा खेल हुन नसकेपछि यी दुवै टोलीले उपाधी बाँडेका थिए । दोस्रो पटक २०१९ मा आर्मीलाई हराउँदै पुलिसले उपाधी जितेको थियो । आर्मी छैटौ पटक फाइनलमा उपविजेतामा सिमित रहेको हो ।
आर्मीले दिएको १ सय ८२ रनको लक्ष्य पुलिसले ३७ दशमलब ५ ओभरमा ४ विकेट गुमाएर पूरा गर्यो ।
पुलिसका लागि शंकर रानाले ४३ बलमा अविजित ६२ रनको अर्धशतकीय ईनिङ खेले । अर्जुन साउदले ५८ बलमा ३६ तथा अमित श्रेष्ठले ५१ बलमा २८ रन बनाए । आरिफ शेखले २७ रनको अविजित ईनिङ खेले । शंकर रानाले छक्का प्रहार गर्दै खेल सकाएका थिए ।
आर्मीका लागि कुशल मल्ल, जितेन्द्र मुखिया, साहाब आलम र वसिर अहमदले समान एक एक विकेट लिए ।
टियु मैदानमा जारी फाइनल खेलमा टस हारेर ब्याटिङ गरेको आर्मीले ४९ दशमलब ५ ओभरमा अल आउट हुदै १ सय ८१ रन मात्र बनायो ।
आर्मीका लागि विवेक यादवले ८१ बलमा ६३ रनको अर्धशतकीय ईनिङ खेले । ओपनर इम्रान शेखले ६६ बलमा २८ तथा सोमपाल कामीले ५८ बलमा ४९ रन बनाए । कुशल मल्लले ३२ बलमा १७ रन बनाए । आठौं विकेटका लागि सोमपाल कामी र विवेक यादवबीचको ५९ रनको साझेदारी सर्वाधिक ठूलो साझेदारी रह्यो ।
दशौं विकेटका लागि यादव र जितेन्द्र मुखियाले ४३ रनको साझेदारी गरे ।
टोलीले सात विकेट गुमाएर ६९ रन बनाउँदा क्रिजमा आएका विवेकको उत्कृष्ट पारीको सहयोगमा आर्मी सम्मानजनक योगफलमा पुग्न सफल रह्यो ।
पुलिसका लागि ललितनारायण राजवंशी र कप्तान दीपेन्द्रसिंह ऐरीले समान तीन तीन विकेट लिए । सागर ढकाल, कुशल भुर्तेल र करण केसीले समान एक एक विकेट लिए ।
योसँगै तीन पटक आर्मी र पुलिस फाइनलमा खेलेकामा तीनमा नै पुलिस अपराजित रहेको छ ।