काठमाडौं । ओमानमा जारी एसीसी मेन्स प्रिमियर कप आज(सोमबार) नेपालले आफ्नो तेस्रो खेलमा हङकङसँग खेल्दैछ ।
नेपाल र हङकङबीचको खेल ओमानको मस्कटमा नेपाली समय अनुसार बिहान पौने १२ बाट सुरु हुदैछ ।
हङकङलाई हराउँदै एक खेल अघि नै नेपाल सेमिफाइनलमा स्थान पक्का गर्न चाहन्छ । पहिलो खेलमा मलेसियालाई हराउँदै प्रिमियर कपमा सुखद सुरुआत गरेको नेपालले कतारलाई हराउँदै लगातार दोस्रो जित निकालेको थियो ।
पहिलो खेलमा कतारलाई हराएको हङकङ दोस्रो खेलमा साउदी अरेबियासँग पराजित भएको थियो । सेमिफाइनल सम्भावना कायमै राख्न हङकङका लागि यो खेलमा जित आवश्यक छ ।
नेपाल र हङकङबीच टी-२० आईमा हालसम्म नौ खेलमा समान चार खेलमा दुवै टोलीले जित निकाल्दा एक खेल वर्षाका कारण नतिजाबिहिन रुपमा सकिएको छ ।
प्रिमियर कपमा नेपाल :
प्रिमियर कपमा आयोजक ओमान, नेपाल, मलेसिया, हङकङ, युएई, बहराइन, कतार कुवेत, कम्बोडिया र साउदी अरेबिया सहभागी रहेका छन् ।
प्रतियोगितामा सहभागी दश राष्ट्रलाई दुई समूहमा विभाजन गरएिको छ । नेपाल समूह ए मा रहेको छ । नेपाल रहेको समूहमा मलेसिया, हङकङ, साउदी अरेबिया र कतार छन् ।
समूह बी मा आयोजक ओमानसहित युएई, कुवेत, कम्बोडिया र बहराइन छन् ।
प्रतियोगितामा समूह चरणको अन्तिम खेलमा नेपालले बैशाख ५ मा साउदी अरेबियासँग खेल्ने छ । यो खेल नेपाली समय अनुसार बिहान पौने १२ मा हुनेछ ।
हरेक समूहका शीर्ष २ टोली सेमिफाइनलमा प्रवेश गर्नेछन् । प्रिमियर कपको विजेता टोलीले एसिया कपमा स्थान बनाउनेछन् । यस संस्करणको एसिया कप टी२० फर्म्याटमा हुनेछ ।
नेपाली टोली :
रोहितकुमार पौडेल(कप्तान), कुशल भुर्तेल, आसिफ शेख, कुशल मल्ल, सन्दीप जोरा, विवेक यादव, गुलसन झा, अनिल शाह, दीपेन्द्रसिंह ऐरी, ललितनारायण राजवंशी, प्रतिश जिसी, करण केसी, सोमपाल कामी, अभिनास बाहोरा ।