काठमाडौं । नेपाललाई एसीसी महिला प्रिमियर कप सेमिफाइनल हराउँदै मलेसियाले एसिया कपमा स्थान बनाएको छ ।
मलेसियाको बायोमास ओभलमा भएको खेलमा मलेसिया ४ विकेटले विजयी भयाे । नेपालले दिएको १ सय १६ रनको लक्ष्य मलेसियाले निर्धारित २० ओभरको अन्तिम बलमा पूरा गर्यो ।
मलेसियाका लागि इल्सा हन्टरले ५३ बलमा ६ चौकाको सहयोगमा अविजित ६९ रनको अर्धशतकीय ईनिङ खेलिन् ।
तेस्रो विकेटका लागि मास इल्सा र इल्सा हन्टरले तेस्रो विकेटका लागि ३६ बलमा २७ रनको साझेदारी गरे । चौथो विकेटका लागि इल्सा हन्टर र महिराना इस्मालीले ३७ बलमा ३६ रनको साझेदारी गरे ।
नेपालका लागि कविता जोशी तथा सीता रानामगरले समान २/२ विकेट लिइन् ।
त्यसअघि टस जितेर पहिले ब्याटिङ गरेको नेपालले निर्धारित २० ओभरमा ६ विकेट गुमाएर १ सय १५ रन बनाएको थियो ।
नेपालका लागि कप्तान इन्दु बर्माले ३७ बलमा २९ रन बनाईन् । १० रनमा नै पहिलो विकेट गुमाएको नेपालका लागि कप्तान बर्मा र ओपनर कविता कुँवरले ३७ बलमा ३५ रनको साझेदारी गरे । कुँवरले ३१ बलमा २३ रन बनाउँदै रनआउट भईन् । रुबिना क्षेत्रीले १८ बलमा २० रन बनाईन् । कप्तान बर्मा र रुबिनाले तेस्रो विकेटका लागि ३१ बलमा ३३ रनको साझेदारी गरे ।
चौथो विकेटका लागि कप्तान बर्मा र डलि भट्टले १६ बलमा २१ रनको साझेदारी गरे । भट्टले १४ बलमा १ चौका र २ छक्काको सहयोगमा २५ रन बनाईन् ।
मलेसियाका लागि माहिरा ईस्मालीले २ तथा उनिफ्राइड दुराईसिंघमले १ विकेट लिईन् ।
सेमिफाइनल जितेसँगेै मलेसियाले आईतबार युएईसँग फाइनल खेल्ने छ । पहिलो सेमिफाइनल खेल जितेर युएईले फाइनलमा स्थान बनाईसकेको छ । युएईले थाइल्याण्डलाई ४ रनले पराजित गरेको थियो ।