काठमाडौं । ओमानमा जारी एसीसी मेन्स प्रिमियर कपको हङकङलाई पराजित गरि नेपालले एक खेल अगावै सेमिफाइनलमा स्थान बनाएको छ ।
एक खेल अगाबै सेमिफाइनलमा स्थान बनाउँने क्रममा नेपालले हङकङलाई ८ विकेटले पराजित गर्यो ।
ओमानको मस्कटमा वर्षाका कारण खेल ढिला सुरु हुँदा १८ ओभरमा छोट्याईएको थियो । हङकङले दिएको १ सय १५ रनको लक्ष्य नेपालले १२ दशमलब २ ओभरमा २ विकेट गुमाई पुरा गर्यो ।
नेपालको जितमा ओपनर आसिफ शेखले १८ बलमा ३ चौका र ३ छक्काको सहयोगमा ४० रनको ईनिङ खेले । अर्का ओपनर कुशल भुर्तेलले १९ बलमा ३ चौका र २ छक्काको सहयोगमा ३२ रन बनाए ।
आसिफले यसै खेलमा आफ्नो टी२० आई करियरमा एक हजार रन पुरा गरेका थिए । यो सफलता प्राप्त गर्ने शेख चौथा नेपाली क्रिकेटर हुन् । उनी अघि दीपेन्द्रसिंह ऐरी, कुशल भुर्तेल र कप्तान रोहितकुमार पौडेलले एक हजार रन पुरा गरिसकेका थिए ।
पहिलो विकेटका लागि भुर्तेल र शेखले ३३ बलमा ७० रनको विस्फोटक सुरुआत दिलाएर नेपाललाई सहज जित तर्फ पुर्याएका थिए । भुर्तेल आउट भएसँगै क्रिजमा आएका कप्तान रोहित पौडेलले २० बलमा ३ चौकाको सहयोगमा अविजित २५ रन बनाए ।
सन्दीप जोराले १७ बलमा १ चौका र १ छक्काको सहयोगमा अविजित १९ रन बनाए ।
हङकङका लागि यासिम मुर्ताजा र इशान खानले समान एक एक विकेट लिए ।
त्यसअघि टस हारेर पहिले ब्याटिङ गरेको हङकङले निर्धारित १८ ओभरको एक बल बाँकी रहँदा अल आउट हुदै १ सय १४ रन बनाएको थियो ।
हङकङका लागि ओपनर अंशुमान रथले २६ बलमा ४ चौका र १ छक्काको सहयोगमा सर्वाधिक ३४ रन बनाए । कप्तान निजाकत खानले ११ बलमा १२ रन तथा जिशान अलिले १४ रन बनाए । इशान खानले ११ रन बनाउँदा अन्य कुनै ब्याटरले दोहोरो अंकमा रन बनाउँन सकेनन् ।
नेपाली कसिलो बलिङ तथा फिल्डिङका कारण हङकङले यस ईनिङमा १ छक्का र ८ चौका प्रहार गर्यो ।
नेपालका लागि अभिनास बोहोराले तीन तथा ललितनारायण राजवंशी र दीपेन्द्रसिंह ऐरीले समान दुई दुई विकेट लिए । करण केसीले एक विकेट लिए । नेपालले रन आउटको रुपमा दुई सफलता हात पारेको थियो ।
