स्कटल्याण्डमा जारि आईसीसी विश्वकप लिग-२ अन्तर्गत त्रिकोणात्मक सिरिजको दोश्रो खेलमा नेपाल र स्कटल्याण्ड प्रतिस्पर्धा गर्दैछन्।
टिटवुड ग्लासगोमा जारि खेलमा टस हारेर ब्याटिंग गरेको स्कटल्याण्डले ४२.४ ओभरमा १४४ रनमा सबै विकेट गुमाएर नेपाललाई १४५ रनको लक्ष प्रस्तुत गरेको छ। स्कोरकार्ड
स्कटल्याण्डको लागि नवौं नम्बरमा ब्याटिंग गरेका गेभीन मेनले करियरकै पहिलो अन्तर्राष्ट्रिय अर्धशतक बनाउने क्रममा सर्वाधिक ६४ रन बनाए। अविजित रहेका उनले ५९ बलमा ७ चौका र १ छक्का प्रहार गरे। मार्क वाटले १७, सफ्यान सरिफले १६ तथा कलुम म्याकलोएडले १३ रन बनाए।
खराब सुरुवात गरेको स्कटल्याण्डले ३३ रन बनाउदा सुरुवाती ५ विकेट गुमायो। त्यसपछि तल्लो क्रमका ब्याट्सम्यानहरुले टिक्ने प्रयास गरेता पनि नेपालले नियमित अन्तरलमा विकेट लियो। ९५ रनमा ९ विकेट गुमेको अवस्थाबाट गेभिन मेनले दशौँ विकेटको लागि हम्जा ताहिरसंग ४९ रनको साझेदारी गरे। ४३ औं ओभरमा दिपेन्द्र ऐरीले उक्त साझेदारी तोड्दै नेपाललाई राहत दिलाए। यो साझेदारी नेपाल बिरुद्ध अन्तर्राष्ट्रिय क्रिकेटमा दशौँ विकेटको लागि हालसम्मकै सर्वाधिक साझेदारी हो।
नेपालको बलिंगमा सोमपाल कामि र आदील आलमले समान ३/ ३ विकेट लिए जुन क्रममा सोमपालले १० ओभरमा ४० तथा आदीलले १० ओभरमा ३१ रन खर्चिए। कप्तान सन्दिप लामिछानेले २ तथा करन केसी र दिपेन्द्र ऐरीले १/१ विकेट लिए।
सिरिजको पहिलो खेलमा नेपाल नामिबियासंग ४० रनले पराजित भएको थियो।
