इन्डियन प्रिमियर लिग ( आईपीएल ) टिम रोयल च्यालेन्जर्स बैंगलोरका कप्तान बिराट कोहली दुई ठूलो कीर्तिमान नजिक रहेका छन्।
सोमबार बैंगलोर कोलकाता नाइट राइडर्स बिरुद्ध मैदानमा उत्रंदै गर्दा कोहली एकै फ़्रेन्चाइज् लागि २ सय खेल खेल्ने आईपीएल इतिहाँसकै पहिलो खेलाडी बन्ने छन्। कोहली आईपीएलको पहिलो सिजन २००८ देखिनै बैंगलोरबाट लिग खेलीरहेका छन्। यस क्रममा उनले १९१ पटक ब्याटिंग गरे ३७.९७ को औशतमा ६,०७६ रन बनाएका छन्। उनले ५ शतक र ४० अर्धशतक बनाउदै २००९ २०११ र २०१६ मा टिमलाई आईपीएल फाइनल यात्रा गराएका थिए।
कोहली पछि एकै टिमको लागि धेरै खेल खेल्ने खेलाडी महेन्द्र सिंह धोनी हुन् जसले चेन्नाईको लागि १८२ खेल खेलेका छन्। यस्तै धोनीका साथी खेलाडी सुरेश रैनाले चेन्नाईको लागि १७२ खेल खेलेका छन्। सबैभन्दा धेरै आईपीएलको खेल खेल्ने सुचीमा कोहली पाँचौ स्थानमा रहेका छन्। महेन्द्र सिंह धोनीले सर्वाधिक २१२, रोहित शर्माले २०७, दिनेश कार्तिकले २०३ तथा सुरेश रैनाले २०१ खेल खेलेका छन्।
यस्तै कोहली अर्को ठूलो कीर्तिमानको पनि नजिक छन्। उनि टि-२० क्रिकेटमा १० हजार रन पुरा गर्न मात्र ७१ रन टाढा रहेका छन्। उक्त रन पुरा गरेको खण्डमा उनि टि-२० क्रिकेटमा १० हजार रन पुरा गर्ने पहिलो भारतीय खेलाडी बन्नेछन्। वेस्टइन्डिजका क्रिस गेल ( १४,२६१ ) र काईरन पोलार्ड ( ११,१७४ ) , पाकिस्तानका शोयब मलिक ( १०,८०८ ) र अस्ट्रेलियाका डेभिड वार्नर ( १००१७ ) ले मात्र हालसम्म १० हजार भन्दा बढी टि-२० मा रन बनाएका छन्। कोहली पछि रोहित शर्मा ( ९,३१५ रन ) ले भारतको लागि धेरै टि-२० मा रन बनाएका छन्।
यो सिजन आईपीएलपछि बैंगलोरको कप्तानी छाड्ने निर्णय गरेका कोहलीले क्रिकेटबाट सन्यास नलिएसम्म बैंगलोरबाट आईपीएल खेल्ने बताएका थिए। उनले २०११ मा पहिलो पटक बैंगलोरको कप्तानी गरेता पनि २०१३ मा पूर्णत कप्तानीको जिम्मेवारी पाएका थिए। सन् २०१६ मा बैंगलोर फाइनल पुग्दा कोहलीले १६ खेलमा ९७३ रन बनाउदै सर्वाधिक रन कर्ता बनेका थिए। त्यस क्रममा उनले एकै सिजन ४ वटा शतक र ७ वटा अर्धशतक बनाएका थिए।
