काठमाडौं । जारी ललितपुर मेयर्स कपमा बिहिबारको दोस्रो खेलमा वागमती प्रदेशले कोशी प्रदेशलाई पराजित गरेको छ ।
आफ्नो तेस्रो खेलमा पहिलो जित निकाल्नेक्रममा बागमतीले कोशीमाथि ८ विकेटको जित हात पारेको हो ।
वर्षाका कारण खेल ढिला सुरु हुँदा खेल १३ ओभरमा छोट्याईको थियो ।
कोशीले दिएको ६४ रनको लक्ष्य बागमतीले ११ दशमलब २ ओभरमा २ विकेट गुमाएर पूरा गर्यो ।
बागमतीको जितमा ओपनर यशु पान्डेले २३ बलमा ५ चौकाको सहयोगमा २६ रन बनाईन् । कन्चन श्रेष्ठ र खुसी डंगोल ११/११ रनमा अविजित रहे ।
कोसीका लागि हिरन्मा रोय र अप्सरी बेगमले समान १/१ विकेट लिए ।
त्यसअघि टस हारेर पहिले ब्याटिङ गरेको कोशीले निर्धारित १३ ओभरमा ६ विकेट गुमाएर ६३ रन बनाएको थियो ।
कोशीका लागि कप्तान अप्सरी बेगमले ३८ बलमा २ चौका र १ छक्काको सहयोगमा ३५ रन बनाईन् । कोशीका अन्य ब्याटरले दोहोरो अंकमा रन बनाउन सकेनन् ।
बागमतीका लागि खुसी डंगोल र मनिषा उपाध्यायले समान २/२ विकेट लिईन् ।
प्रतियोगितामा गत वर्ष महिला प्रधानमन्त्री कपको शीर्ष चार टोली र ललितपुर मेयर्स एघारको टोली सहभागी छन् ।
राउन्ड रोबिन लिगका आधारमा जारी प्रतियोगिताको शीर्ष दुई टोली फाइनल प्रवेश गर्ने छन् ।