काठमाडौं । एनसिसीएस महिला तथा पुरुष टी-२० क्रिकेट प्रतियोगिताको पुरुषतर्फ उपाधिका लागि भक्तपुर क्रिकेट सेन्टर र क्रिकेट एक्सिलेन्स सेन्टर (सीएसी) काठमाडौं भिड्ने भएका छन् ।
मुलपानी क्रिकेट मैदानमा शुक्रबार सम्पन्न दुई सेमिफाइनलमा जित हात पार्दै भक्तपुर र सीएसीले उपाधीका लागि खेल्ने पक्का गरेका हुन् ।
शुक्रबार भएको पहिलो सेमिफाइनल खेलमा सीएसी भक्तपुरविरुद्ध ७३ रनको फराकिलो जित निकाल्दै सीएसी काठमाडौं फाइनल प्रवेश गरेको हो ।
काठमाडौंले प्रस्तुत गरेको १ सय ५६ रनको लक्ष्य पछ्याएको भक्तपुर १७ दशमलब ४ ओभरमा ८२ रनमै समेटियो ।
भक्तपुरका लागि विवेक लामाले २४, विपिन आचार्यले १६ र रोशन साउदले १० रन बनाए ।
काठमाडौंका लागि सोनु देवकोटाले तीन तथा दीपेन्द्र रावत र दयानन्द मण्डलले समान दुई विकेट लिए ।
त्यसअघि टस हारेर ब्याटिङको निम्तो पाएको काठमाडौंले निर्धारित २० ओभरमा तीन विकेट गुमाउँदै १५५ रनको योगफल तयार पारेको थियो ।
काठमाडौंका लागि रित गौतमले ५४ बलमा अविजित ५४ रनको योगदान गरे । यसैगरी सुशान्त थापाले ५४ र सोनु देवकोटाले १५ रन बनाए ।
भक्तपुरका लागि अविनाश बस्याल, विपिन न्यौपाने र किरण चन्दले समान एक विकेट लिए ।
शुक्रबार नै भएको दोस्रो सेमिफाइनल खेलमा भक्तपुरले ग्रेट हिमालय क्रिकेट सेन्टरविरुद्ध चार रनको रोमाञ्चक जित निकालेको थियो ।
भक्तपुरले प्रस्तुत गरेको १ सय २४ रनको लक्ष्य पछ्याएको ग्रेट हिमालयले २० ओभर नै ब्याटिङ गरे पनि आठ विकेट गुमाउँदै १ सय १९ रन बनायो ।
ग्रेट हिमालयका लागि क्रिस कार्कीले २१, इशान पाण्डेले १८ र रुपेश श्रीवास्तवले १५ रन बनाए ।
भक्तपुरका लागि अरुण ऐरी र नितेश पटेलले समान दुई तथा मुकेश ओझाले एक विकेट लिए ।
त्यसअघि टस जितेर ब्याटिङको निम्तो पाएको भक्तपुरले निर्धारित २० ओभरमा चार विकेट गुमाउँदै १ सय २३ रनको योगफल तयार पारेको थियो ।
भक्तपुरका लागि दीपक बोहराले ३४ बलमा ५०, अरुण ऐरीले ३१ र विनोद तामाङले २१ रन बनाए ।
ग्रेट हिमालयका लागि कलम खत्रीले दुई तथा रुपेश श्रीवास्तव र सन्दीप पराजुलीले समान एक विकेट लिए ।
प्रतियोगिताको फाइनल शनिबार हुनेछ ।
