काठमाडौं । १७ औं संस्करणको इन्डियन प्रिमियर लिग (आइपीएल) को ५३ औं खेलमा चेन्नई सुपर किंग्सले पञ्जाब किंग्समाथि सहज जित निकालेको छ ।
पञ्जाबको घरेलु मैदान एचपीसीए क्रिकेट स्टेडियम धर्मशालामा चेन्नईले २८ रनको सहज जित निकाल्यो ।
चेन्नईले दिएको १ सय ६८ रनको लक्ष्य पछ्याएको पञ्जाब २० ओभरमा ९ विकेट गुमाएर १ सय ३९ रन मात्र बनाउँन सक्यो ।
पञ्जाबका लागि ओपनर प्रभसिमरन सिंहले २३ बलमा २ चौका र २ छक्काको सहयोगमा ३० रन बनाए । शंशाक सिंहले २० बलमा ४ चौकाको सहयोगमा २७ रन बनाए । राहुल चाहरले १० बलमा १६ रन बनाए ।
चेन्नईका लागि रविन्द्र जडेजाले तीन तथा तुसार देशपान्डे र समरजीत सिंहले समान दुई विकेट लिए । शार्दुल ठाकुर र मिचेल स्यान्टेनरले समान एक एक विकेट लिए ।
त्यसअघि टस हारेर पहिले ब्याटिङ चेन्नईले २० ओभरमा ९ विकेट गुमाएर १ सय ६७ रन बनाएको थियो ।
चेन्नईका लागि रविन्द्र जडेजाले २६ बलमा ३ चौका र २ छक्काको सहयोगमा ४३ रन बनाए । कप्तान ऋतुराज गायकवाडले २१ बलमा ४ चौका र १ छक्काको सहयोगमा ३२ रन बनाए । ड्यारियल मिचेलले १९ बलमा २ चौका र १ छक्काको सहयोगमा ३० रन बनाए ।
पञ्जाबका लागि राहुल चाहर र हर्षल पटेलले समान तीन तीन तथा अर्शदिप सिंहले दुई विकेट लिए ।
एघार खेलमा छ खेलमा जितका साथ चेन्नई तेस्रो स्थानमा उक्लिएको छ । एघारौं खेलमा सात हारका साथ पञ्जाब आठौं स्थानमा कायमै छ ।
यस हारसँगै पञ्जाबको प्लेअफ पुग्ने सम्भावना कमजोर बनेको छ ।
