काठमाडौं । छैटौं संस्करणको पाँचपोखरी टी-ट्वान्टी जिल्ला स्तरिय क्रिकेट प्रतियोगिता फागुन १२ बाट तल्लो मुलपानी मैदानमा आयोजना हुने भएको छ ।
पाँचपोखरी थाङ्पाल गाँउपालीकाको आयोजनामा हुने यस प्रतियोगिता फागुन १९ सम्म संचालन हुनेछ । प्रतियोगितामा गत संस्करणसम्म जिल्ला भित्रका मात्र खेलाडी समावेश हुदै आएका थिए । तर, यस संस्करणबाट भने सहभागी रहने टोलीले एक जना उमेर समूह तथा सिनियर टोलीबाट खेलिसकेका खेलाडी समावेश गर्न सक्नेछन् ।
यस प्रतियोगितामा सिन्धुपाल्चोक जिल्लाका विभिन्न आठ टोलीको सहभागीता रहने छ । सुरुआतका तीन संस्करण थाङ्पालधाप गाँउपालिकामा संचालन भए पनि दुई संस्करण देखि मुलपानी अन्तराष्ट्रिय क्रिकेट मैदानमा हुदै आएको छ । आयोजकका अनुसार प्रतियोगिताको सम्पूर्ण तयारी पूरा भएको छ ।
प्रतियोगिताका विजेताले ट्रफि, मेडल र प्रमाणपत्र सहित १ लाख नगद प्राप्त गर्नेछ । उपविजेताले ट्रफि, मेडल र प्रमाणपत्र सहित ५० हजार नगद प्राप्त गर्नेछ । प्रतियोगिताका सर्वोत्कृष्ट खेलाडी, उत्कृष्ट ब्याटर, बलर तथा अलराउन्डरले ट्रफि र प्रमाणपत्र प्राप्त गर्नेछन् ।
आयोजकका अनुसार काठमाडौंमा रहेको ग्रेट हिमालय क्रिकेट एकेडेमीले प्रतियोगिता सर्वोत्कृष्ट खेलाडीलाई एक वर्ष तथा उत्कृष्ट बलर र ब्याटरलाई ६ महिना निशुल्क प्रशिक्षणको समेत व्यवस्था गर्नेछ ।
थाङ्पालधाप गाँउपालिकाले स्थानिय दुई खेलाडीलाई उच्च स्तरिय प्रशिक्षणका लागि भारत पठाएको अध्यक्ष टासी लामा ह्योल्मोले बताउनु भयो । गाउँपालीका स्थानिय तहमा खेलकुदलाई विकासमा हरेक कोसिस गरिरहेको ह्योल्मोले बताउँनु भयो ।
