युएईको नेपाल भ्रमण अन्तर्गत तिन खेलको एकदिवसीय अन्तर्राष्ट्रिय सिरिज अन्तर्गत दोश्रो खेलमा नेपालले १९२ रनको लक्ष्य पाएको छ।
टियु अन्तर्राष्ट्रिय क्रिकेट मैदान किर्तिपुरमा टस जितेर ब्याटिंग रोजेको युएईले ४३.२ ओभरमा सबै विकेट गुमाएर १९१ रन मात्र बनायो।
युएईको लागि ओपनर मुहम्मद वासिमले सर्व्दिक ५० रन बनाए। अलिशान शरफुले ३५, भ्रित्या अरविन्दले २५, बसिल हमिदले २४ तथा कप्तान सिपि रिजवानले २२ रन बनाए।
युएई ओपनर मुहम्मद वासिम र भृत्या अरविन्दले ७२ रनको ओपनिंग साझेदारी गरे। बाह्रौं ओभारमा दिपेन्द्र ऐरीले अरविन्दलाई क्याच आउट पार्दै नेपाललाई खेलमा फर्काए। त्यसपछि युएईले लगातार विकेट गुमायो। पन्ध्रौँ ओभरमा अर्धशतक पुरा गरेलगत्तै वासिम ललित राजबंशीबाट क्याच आउट भए। अघिल्लो खेलमा अर्धशतक बनाएका रोहन मुस्तफा ४ रन बनाएर उन्नाईसौं ओभरमा सोमपाल कामिबाट बोल्ड भए। युएईलाई अझ दबाब बनाउन लेग स्पिनर कुशल भुर्तेलले युएई कप्तान सिपि रिजवानलाई रोहित पौडेलबाट क्याच आउट पारे। कुशलको यो पहिलो एकदिवसीय अन्तर्राष्ट्रिय विकेट थियो।
७२/० बाट ११२/४ को अवस्थामा पुगेको युएईलाई अलिशान शरफु र डेब्यु गरेका विष्णु सुकुमरनले अघि बढाए। दुवैले पाँचौ विकेटको लागि ४३ रन जोडे। चौतिसौं ओभरमा सुकुमरनलाई करन केसीले विकेटपछाडी क्याच आउट पारे। त्यसपछि भने नेपालले लगातार विकेट लिंदै युएईलाई दवावमा राख्यो। फलस्वरुप ४३.२ ओभरमा युएई अलआउट भयो।
नेपालको बलिंगमा सोमपाल कामि र ललित राजवंशीले ३/३ विकेट लिए। करन केसी, गुल्सन झा, दिपेन्द्र ऐरी र कुशल भुर्तेलले १/१ विकेट लिए।
सिरिजको पहिलो खेलमा युएई ८४ रनले विजयी भएको थियो।
