- विकेटनेपाल, बैशाख २१ – शुक्रबार
नेपाली महिला क्रिकेट टिम तथा विभागीय टिम सशस्त्र प्रहरी बलको एपीएफका ४ महिला क्रिकेटरहरु अभ्यास तथा प्रशिक्षणका लागि न्युजिल्यान्ड जाने भएका हुन् । भ्रमण तालिका सेप्टेम्बर १२ देखि २९ सम्मको रहेको छ ।
नेपालका बिनु बुढाथोकी, सिता रानामगर, सरिता मगर र करुणा भण्डारी सहित बंगलादेशका १२ महिला क्रिकेटरहरु न्युजिल्यान्ड जान लागेका हुन् । उक्त भ्रमणमा नेपाल र बंगलादेशका खेलाडीहरु सम्मिलित टिमले न्युजिल्यान्डका स्थानीय टिमहरुसँग अभ्यास खेलहरु खेल्ने कार्यक्रम रहेको छ ।
ग्रेट ब्रिटेनका नागरिक तथा एपीएफ क्लबका भोलुन्टर प्रशिक्षक जोन कप्प्स जेन्नरले खेलाडीहरुलाई यस्तो ब्यबस्था गरेका हुन्, उनले यो भ्रमणले नेपाली खेलाडीहरुको स्तर वृद्धि गर्ने बताए । उनले भनेका छन्, बंगलादेशले क्रिकेटमा नेपालले भन्दा धेरै प्रगति गरेको छ र उनिहरुसँगै खेल्न पाउँदा नेपाली खेलाडीको स्तर बढ्ने छ भने त्यहाँका स्थानीय क्लबसँगको खेलले विभिन्न हावापानिमा खेल्न सहयोग गर्ने छ ।
सेप्टेम्बर १२ तारिखमा अकल्याण्डमा पुग्ने तालिका रहेको नेपाल र बंगलादेशका खेलाडीहरु सम्मिलित टिमले त्यहाँ रहुन्जेल क्रिस्चर्च, लीस्टन, मेनपावर ओभल, अकरोया, हगले ओभल, ग्रेमाउथ, क्विन्सटाउन लगायतका ठाउँमा एकदिवसीय र टी२० गरेर १० खेलहरु खेल्नेछन् ।
नेपाली रास्ट्रीय पुरुष क्रिकेट टिमले आफ्नो प्रदर्शनलाई अगाडी बढाउँदै गर्दा महिला क्रिकेट टिमको प्रदर्शन भने खस्कँदै गएको छ । क्रिकेट एसोसिएसन अफ नेपाल (क्यान) निलम्बनमा परेपनि प्राइभेट स्तरबाट लगातार आयोजना हुँदै आएका प्रतियोगिताले नेपाली क्रिकेटलाई सम्हाल्ने तथा अगाडी बढाउने कार्य जारि राखेपनि महिला क्रिकेटको अवस्था भने फरक छ । विभिन्न समयमा खेलाडी आफैले खर्च व्यहोर्दै कहिले भारत त कहिले बंगलादेश लगायतका देशमा प्रशिक्षण गर्दै आईरहेका छन् । पछिल्लो पटक महिला क्रिकेट प्रतियोगिता (प्रधानमन्त्री कप क्रिकेट) फाल्गुन महिनामा आयोजना भएको थियो जुन बर्षको एकमात्र प्रतियोगिता थियो ।
(द हिमालयन टाइम्सको सहयोगमा तयार पारिएको)
