भारतीय क्रिकेटर सुरेश रैनाले अन्तर्राष्ट्रिय क्रिकेटबाट सन्यास घोषणा गरेका छन्। भारतीय पुर्व कप्तान महेन्द्र सिंह धोनीले सन्यास लिएसंगै ३४ वर्षीय रैनाले पनि अन्तर्राष्ट्रिय क्रिकेटबाट बिदा लिने घोषणा गरेका हुन्।
भारतको लागि १८ टेस्ट, २२६ एकदिवसीय तथा ७८ टि-२० खेलेका रैना अन्तिम पटक २०१८ मा भारतको जर्सीमा देखिएका थिए। उनले इंग्ल्यान्ड बिरुद्ध २०१८ जुलाईमा एकदिवसीय खेलेका थिए। अन्तिम टेस्ट भने उनले २०१५ मा अस्ट्रेलिया बिरुद्ध खेलेका थिए।
रैनाले भारतको लागि सन् २००५ मा श्रीलंका बिरुद्ध एकदिवसीयमा डेब्यु गरेका थिए भने २००६ मा टि-२० र २०१० मा टेस्ट डेब्यु गरेका थिए।
बायाँ हाते ब्याट्सम्यानले एकदिवसीय करियरमा ५ शतक र ३६ अर्धशतक मद्दतले ५,६१५ रन बनाएका थिए। यस्तै टेस्टमा १ शतक र ७ अर्धशतक मद्दतले ७६८ रन तथा टि-२० मा १ शतक र ५ अर्धशतक मद्दतले १,६०५ रन बनाएका छन्।
रैना भारतले २०११ को टि-२० विश्वकप जित्दा टिमको सदस्य रहेका थिए। उनि क्रिकेटको तिन वटै फर्म्याटमा शतक प्रहार गर्ने पहिलो भारतीय ब्याट्सम्यान समेत हुन्। उनले सन् २०१० को टि-२० विश्वकपमा शतक बनाउदै भारतकै पहिलो र विश्वकै तेश्रो टि-२० विश्वकपमा शतक प्रहार गर्ने ब्याट्सम्यान बनेका थिए।
रैना भारतको लागि डेब्यु टेस्टमा शतक बनाउदै १२ औं भारतीय खेलाडी समेत हुन्। यस्तै उनि टि-२० र एकदिवसीय विश्वकपमा शतक बनाउने एक मात्र भारतीय ब्याट्सम्यान पनि हुन्।
रैनाले सन् २०११ को वेस्टइन्डिज टुरमा भारतीय टिमको कप्तानी समेत गरेका थिए जुन सिरिज भारतले जितेको थियो। यस्तै २०१४ को बंगलादेश सिरिज मा समेत उनले भारतको दोश्रो पटक कप्तानी गरेका थिए।
पछिल्लो समय भारतीय टिममा नपरेता पनि रैना आईपीएलमा भने लगातार धोनी कप्तानीको टिममा उपकप्तानको रुपमा खेलीरहेका छन्। आईपीएलमा ५ हजार रन बनाउने रैना पहिलो क्रिकेटर समेत हुन्।
