राष्ट्रिय खेलकुद परिषदको आर्थिक सहयोग र नेपाल क्रिकेट संघको आयोजनामा दाङमा पुष ११ गते देखि प्रधानमन्त्री कप महिला टि-२० प्रतियोगिता सुरु हुने भएको छ।
क्यानले सोमबार सार्वजनिक गरेको खेल तालिका अनुसार प्रतियोगिता पुष ११ गते सुरु भएर पुष १९ गते सकिनेछ। यस अघि पुरुषतर्फको प्रतियोगिता पनि पुष-११ गते देखि सुरु हुने बताईएको थियो जुन अब महिला प्रतियोगिता पछि मात्र हुने क्यान श्रोतले बताएको छ।
दाङको लमही क्रिकेट मैदानमा प्रत्येक दिन दुई खेल हुनेछन्। पुष-१९ गते फाइनल खेलको अघिल्लो दिन मात्र एक दिन आराम गर्ने दिन राखिएको छ। दिनको पहिलो खेल ९ बजे विहान तथा दोश्रो खेल १ बजे दिउसो देखि सुरु हुनेछ।
प्रतियोगिताको उद्घाटन खेलमा लुम्बिनी र प्रदेश-२ ले प्रतिस्पर्धा गर्नेछन्। सोहि दिन एपीएफ र कर्णाली प्रदेश बीच दोश्रो खेल हुनेछ।
प्रतियोगितामा सहभागी एउटा बिभाग र ७ वटा प्रदेश गरि ८ वटा टिमलाई दुईवटा समुहमा बिभाजन गरिएको छ। समुह ‘ए’ मा शशस्त्र प्रहरी बल ( एपीएफ ), प्रदेश-२, कर्णाली प्रदेश र लुम्बिनी प्रदेश रहेका छन् भने समुह ‘बि’ मा सुदुर पश्चिम प्रदेश, बागमती प्रदेश, गण्डकी प्रदेश र प्रदेश-१ रहेका छन्।
लिग चरणमा समुहमा एकअर्का बिरुद्ध १/१ खेल खेलीसकेपछि दुवै समुहबाट उत्कृस्ट हुने २-२ वटा टिम सेमीफाइनल प्रवेश गर्नेछन्।
प्रधानमन्त्री कप महिला राष्ट्रिय प्रतियोगिता पछिल्लो पटक २०१९ जुनमा महेन्द्रनगरमा आयोजना भएको थियो जसको उपाधि एपीएफले सुदूरपश्चिम प्रदेशलाई पराजित गर्दै जितेको थियो।