चैत्र,२५,धनगढी।
चटकपुर स्पोर्टस क्लब नेपालको आयोजना तथा कैलाली जिल्ला क्रिकेट संघको संरक्षणमा यहि चैत्र २४ गतेदेखि धनगढीको फाप्ला क्रिकेट मैदानमा सुरु भएको प्रथम यू-१६ त्रीकोणात्मक एकदिवसीय क्रिकेट सिरिजको दोश्रो एकदिवसीय खेलमा अनुराग शार्की र अजय कँडेलको उत्कृष्ट अर्धशतकको मद्दतमा धनगढी क्रिकेट एकेडेमीले भ्रमण टोलि एन बी स्पोर्टस क्लब कोहलपुरलाई १५० रनको फराकिलो अन्तरले पराजित गर्दै सिरिजमा पहिलो जित निकालेको छ ।
सिरिज अन्तर्गतको दोश्रो एकदिवसीय खेलमा टस हारेर पहिले ब्याटिंगको निम्तो पाएको धनगढी क्रिकेट एकेडेमीले निर्धारित ४० ओभरमा ९ विकेट गुमाउँदै २७४ रनको योगफल तयार पार्यो। उसका लागि अनुराग शार्कीले ८४ बलमा सर्वाधिक ८२ तथा अजय कँडेलले ७१ बलमा ५१ रनको अर्धशतकिय पारी खेले । यस्तै, महेश देउवाले अविजित २७, निरज ऐरले २१, आर्यन पन्थीले १९ र कप्तान सचिन साउँदले १४ रनको योगदान दिए ।
बलिङतर्फ एन बी स्पोर्टस क्लबका लागि मिलन क्षेत्रीले ६ ओभरमा ५० रन खर्चिदै सर्वाधिक ३ विकेट लिए ।
२७५ रनको विशाल विजयी लक्ष्य पछ्याएको एन बी स्पोर्टस क्लबले ३०.५ ओभरमा सम्पुर्ण विकेट गुमाउँदै मात्रै १२४ रन बनाउन सक्यो । उसका लागि विवेक भण्डारीले ६२ बलमा सर्वाधिक ४२ र दिपेश थापाले ४७ बलमा २७ रन बनाउनुबाहेक अन्य ब्याटरले दोहोरो अंकमा रन बनाउन सकेनन् ।
बलिङतर्फ धनगढी क्रिकेट एकेडेमीका लागि निरज ऐरले ६.५ ओभरमा १ मेडेनसहित १३ रन खर्चिदै सर्वाधिक ४ विकेट लिए । यस्तै, इश्वरी बिष्ट,रोशन रावल,मनिषा चौधरी र महेश देउवाले पनि समान १/१ विकेट हात पारे ।
खेलमा म्यान अफ दि म्याच उत्कृष्ट अर्धशतक प्रहार गर्ने अनुराग शार्की घोषित भए ।
प्रथम यू-१६ त्रीकोणात्मक एकदिवसीय क्रिकेट सिरिजको तेश्रो एकदिवसीय खेल भोलि बिहान ९:३० बजेदेखि धनगढीको फाप्ला क्रिकेट मैदानमा अर्को घरेलुु टोलि कैलाली जिल्लाक्रिकेट क्लब र पाहुना टोलि एन बी स्पोर्टस क्लब कोहलपुरबीच निकै रोमाञ्चक हुने सिरिज निर्देशक लोकेश जोशीले बताउनु भयो ।