नामिबियामा डिसेम्बर १ तारिख देखि सुरु हुने आईसीसी विश्वकप लिग-२ अन्तर्गतको त्रिकोणात्मक सिरिजको लागि नेपाली टिमको घोषणा भएको छ।
डिसेम्बर १ देखि ८ तारिखसम्म नेपालले घरेलु टिम नामिबिया र स्कटल्याण्डसंग एकदिवसीय अन्तर्राष्ट्रिय सिरिज खेल्नेछ ।
रोहित पौडेल कप्तानीको टिममा युवा दायाँ हाते फास्ट बलर नन्दन यादवले मौका पाएका छन्। नेपाली अन्डर-१९ राष्ट्रिय टिमको प्रतिनिधित्व गरिसकेका यादव घरेलु फ़्रेन्चाइज् लिगमा नियमित राम्रो प्रदर्शन गर्दै आएका यादव पहिलो पटक राष्ट्रिय टिममा अटाएका हुन् । भर्खरै सम्पन्न प्रधानमन्त्री कप एकदिवसीय प्रतियोगितामा बागमती प्रदेशको लागि खेलेका यादवले ४ खेलमा ६ विकेट लिएका थिए । यादव गत वर्ष एभरेस्ट प्रिमियर लिगमा पोखरा राइनोजको लागि खेल्ने क्रममा ८ खेलको ७ इनिंग्समा ९ विकेट लिंदै चौंथो सर्वाधिक विकेटकर्ता थिए । गत वर्ष प्रधानमन्त्रीकपमा यादवले ५ खेलमा ८ विकेट लिएका थिए। यादव आक्रामक ब्याट्सम्यान समेत हुन् जो तल्लो क्रममा विस्फोटक सटहरु खेल्ने क्षमता राख्छन् ।
भर्खरै सम्पन्न घरेलु सिरिजमा टिममा अरहेका फास्ट बलिंग अलराउण्डर गुल्सन झा, देब्रे हाते ब्याटिंग अलराउण्डर हरिशंकर शाह तथा देब्रे हाते स्पिनर सागर ढकालले टिममा निरन्तरता पाएका छन् । सागरले युएई सिरिजमा कुनै पनि खेलमा मौका पाएका थिएनन्।
मोहम्मद आदील आलम, कमल सिंह ऐरी, भिम शार्कीले भने टिममा स्थान पाउन सकेनन् ।
घोषित १४ सदस्यीय नेपाली टिम : रोहित पौडेल, अर्जुन साउद, आसिफ शेख, ज्ञानेन्द्र मल्ल, दिपेन्द्र ऐरी, आरिफ शेख, कुशल भुर्तेल, गुल्सन झा, ललित राजवंशी, करन केसी, सोमपाल कामि, हरिशंकर शाह, सागर ढकाल, नन्दन यादव