काठमाडौं । अस्ट्रेलियाको सिड्नीमा जारि अभानी प्रिमियर लिगमा अभानी क्रिकेट क्लब र रोयल खुकुरी क्रिकेट क्लबले जित निकालेका छन् ।
चौथो जित निकाल्ने क्रममा अभानीले एक्स्ट्राटेक क्रिकेट क्लबलाई १ सय ४७ रनको फराकिलो अन्तरमा पराजित गरेको हो ।
पहिले ब्याटिङ गरेको अभानीले निर्धारित २० ओभरमा २ विकेट गुमाएर २ सय ३४ रन बनाएको थियो ।
अभानीका लागि प्रदिपसिंह ऐरी, अमित श्रेष्ठ र रमन जैसले अर्धशतकी ईनिङ खेलेका थिए । ऐरीले २६ बलमा ८७, अमितले ५३ बलमा अविजित ७६ तथा रमनले ४३ बलमा ५८ रन बनाए ।
एक्स्ट्राटेकका लागि प्रयास रेग्मी र दिपेन्द्र थापाले समान एक एक विकेट लिए ।
२ सय ३५ रनको लक्ष्य पछ्याएको एक्स्ट्राटेकले १६.४ ओभरमा अल आउट हुदै ८७ रन मात्र बनाउन सक्यो ।
एक्स्ट्राटेकका लागि भुमिराजले ३१ बलमा २५, रोशन गुरागाईँले १५ बलमा १६ तथा प्रयास रेग्मीले ८ बलमा ११ रन बनाए ।
अभानीका लागि राजविन पाठक र जितेन्द्र मुखियाले समान तीन तीन तथा अभिनास कर्णले दुई विकेट लिए । २६ बलमा ८७ रन बनाएका अभानी क्लबका प्रदिपसिंह ऐरी खेलको प्लेयर अफ द म्याच भए ।
पाँच खेलमा चार जित र एक हारका साथ अभानी अंक तालिकाको शीर्ष स्थानमा छ । पराजित एक्स्ट्राटेक चार खेलमा एक जित तथा ३ हारका साथ सातौं स्थानमा छ ।
दोस्रो खेलमा रोयल खुकुरी क्लबले कंगारु क्रिकेट क्लबलाई १२ रनले पराजित गरेको छ ।
पहिले ब्याटिङ गरेको खुकुरीले २० ओभरमा ८ विकेट गुमाएर १ सय ५९ रन बनाएको थियो ।
खुकुरीका लागि असिम रेग्मीले ३२ बलमा ३८ तथा कप्तान पियुष गौतमले १२ बलमा २१ रन बनाए ।
कंगारुका लागि सुरज पौडेलले तीन तथा कप्तान अमित शर्मा र सुसिल श्रेष्ठले समान दुई दुई विकेट लिए ।
१ सय ६० रनको लक्ष्य पछ्याएको कंगारुले २० ओभरमा ९ विकेट गुमाएर १ सय ४७ रन मात्र बनाउँन सक्यो ।
कंगारुका लागि रोजल राउतले ३५ बलमा ३९ तथा कप्तान अमित शर्माले ७ बलमा १२ रन बनाए ।
खुकुरीका लागि सुलभ राउत र प्रज्वलले समान दुई दुई तथा सागर थापाले एक विकेट लिए ।
चार खेलमा तीन जित र एक हारका साथ खुकुरी दोस्रो स्थानमा छ । चार खेलमा दुई जित र दुई हारका साथ कंगारु पाँचौ स्थानमा छ ।
