काठमाडौं । नेपालले सन् २०१४ पछि दश वर्षको अन्तरालमा सन् २०२४ मा वेस्ट इन्डिज र अमेरिकामा जारी टी-२० विश्वकपमा सहभागीता जनाउदै समूह चरणबाट नै आफ्नो यात्रा समाप्त गरेको छ ।
पहिलो पटक विश्वकपको इतिहासमा २० राष्ट्रको सहभागीता रहेको यस विश्वकपमा नेपाल समूह डीमा रहेको थियो । समूह डीमा नेपालको अलावा नेदरल्यान्ड्स, श्रीलंका, दक्षिण अफ्रिका र बंगलादेश रहेका थिए । नेपालले कुनै खेलमा पनि विजयी हुन नसकि विश्वकपको यात्रा समाप्त गरेको छ । चार मध्ये एक खेल वर्षाका कारण खेल्न नसकेको नेपालले बाँकी तीन खेलमा कुनै अंक जोड्न सकेन ।
यो विश्वकपमा नेपाली टिम तथा केही नेपाली क्रिकेटर प्रदर्शन यस्तो रह्यो
१. टिमको उच्च योगफल
नेपालले दक्षिण अफ्रिकाविरुद्ध ७ विकेट गुमाएर बनाएको १ सय १४ रन नै यस विश्वकपको उच्च योगफल हो । आसिफ शेखको ४२ रनको सहयोगमा नेपालले १ सय १४ रन बनाएको थियो । दक्षिण अफ्रिकाविरुद्धको खेल नेपालले एक रनले गुमाएको थियो । नेदरल्यान्ड्ससँगको पहिलो खेलमा १ सय ६ रन नेपालले बनाएको दोस्रो ठूलो योगफल हो । भने, बंगलादेशविरुद्ध नेपालले अल आउट हुदै ८५ रन बनाएको थियो ।
२. व्यक्तिगत उच्च रन
नेपालका ब्याटरलाई यस विश्वकपमा रन जोड्न एकदमै समस्या देखिएको थियो । नेपालका लागि यस प्रतियोगितामा सर्वाधिक रनकर्ताको सुचीमा पहिलो स्थान आसिफ शेख रहेका छन् । ओपनर ब्याटरका रुपमा खेलेका शेखले प्रतियोगिता भर ३ इनिङमा ६३ रन बनाउन सफल भए । आसिफले दक्षिण अफ्रिकाविरुद्ध बनाएको ४२ रन नै उच्च योगफल हो । यस सूचीको दोस्रो स्थानमा अनिल शाह रहेका छन् । त्यस्तै तेस्रो स्थानमा कुशल मल्ल रहेका छन् ।
३. सर्वाधिक विकेट
यस प्रतियोगितामा नेपालको तर्फबाट सर्वाधिक धेरै विकेट दीपेन्द्रसिंह ऐरीको नाममा रहेको थियो । उनले प्रतियोगितामा तीन खेल खेल्दै ६ विकेट लिएका थिए । दीपेन्द्रले ५ दशमलब २५ को ईकोनोमीमा रन खर्चिएका थिए । सर्वाधिक विकेट लिनेको दोस्रो स्थानमा चार विकेटका साथ कुशल भुर्तेल रहँदा तेस्रो स्थानमा तीन विकेट लिएका सोमपाल कामी रहेका छन् ।
४. सर्वाधिक छक्का
अलराउन्डर करण केसीले दुई इनिङमा दुई छक्का प्रहार गर्दै शीर्ष स्थानमा रहेका छन् । यस प्रतियोगितामा नेपालले नौ छक्का प्रहार गरेको थियो ।
