काठमाडौं । नवौं संस्करणको टी-२० विश्वकपको सेमिफाइनलमा स्थान बनाउँन अस्ट्रेलियाले भारतबाट २ सय ६ रनको लक्ष्य पाएको छ ।
वेस्ट इन्डिजको सेन्ट लुसियामा टस हारेर पहिले ब्याटिङ गरेको भारतले कप्तान रोहित शर्माको सानदार अर्धशतकमा निर्धारित २० ओभरमा ५ विकेट गुमाएर २ सय ५ रन बनायो ।
भारतका लागि कप्तान शर्माले ४१ बलमा ७ चौका र ८ छक्काको सहयोगमा ९२ रनको सानदार अर्धशतकीय ईनिङ खेले । सुर्यकुमार यादवले १६ बलमा ३१ तथा शिभम दुवेले २२ बलमा २८ रन बनाए ।
अस्ट्रेलियाका लागि मिचेल स्टार्क र मार्कस स्टोईनेसले समान दुई दुई तथा जस हेजलवुडले एक विकेट लिए ।
भारतमाथि फराकिलो जितका साथ सेमिफाइनलमा स्थान बनाउँने लक्ष्यमा अस्ट्रेलिया रहेको छ । सुपर एटको पहिलो खेलमा बंगलादेशलाई पराजित गरेको अस्ट्रेलियाले दोस्रो खेलमा अफगानिस्तानसँग हार व्यहोरेको थियो ।
सुपर एटको दुवै खेलमा विजयी भारत अस्ट्रेलियालाई हराउँदै अपराजित रुपमा सेमिफाइनल प्रवेश गर्न चाहन्छ । भारत विजयी भएमा समूहबाट सेमिफाइनल पुग्ने दोस्रो टोलीको निणर्य मंगलबार बिहानको खेलबाट हुनेछ ।
