काठमाडौं । नवौं संस्करणको टी-२० विश्वकपको सुपर एटको अन्तिम खेलमा अस्ट्रेलियालाई हराउँदै भारत अपराजित रहँदै सेमिफाइनलमा स्थान बनाउँन सफल भएको छ ।
वेस्ट इन्डिजको सेन्ट लुसियामा अपराजित रुपमा सेमिफाइनलमा स्थान बनाएको भारतले २४ रनको जित हात पार्यो ।
भारतले दिएको २ सय ६ रनको लक्ष्य पछ्याएको अस्ट्रेलियाले २० ओभरमा ७ विकेट गुमाएर १ सय ८१ रन मात्र बनाउन सक्यो ।
अस्ट्रेलियाका लागि ट्राभिस हेडले ४३ बलमा ९ चौका र ४ छक्काको सहयोगमा ७६ रनको अर्धशतकीय ईनिङ खेले । कप्तान मिचेल मार्शले २८ बलमा ३७ तथा ग्लेन म्याक्सवेलले १२ बलमा १९ रन बनाए ।
भारतका लागि कुलदिप यादवले दुई तथा अर्शदिप सिंह, जसप्रित बुमराह र अक्षर पटेलले समान एक एक विकेट लिए ।
त्यसअघि टस हारेर पहिले ब्याटिङ गरेको भारतले कप्तान रोहित शर्माको सानदार अर्धशतकमा निर्धारित २० ओभरमा ५ विकेट गुमाएर २ सय ५ रन बनाएको थियो ।
भारतका लागि कप्तान शर्माले ४१ बलमा ७ चौका र ८ छक्काको सहयोगमा ९२ रनको सानदार अर्धशतकीय ईनिङ खेले । सुर्यकुमार यादवले १६ बलमा ३१ तथा शिभम दुवेले २२ बलमा २८ रन बनाए ।
अस्ट्रेलियाका लागि मिचेल स्टार्क र मार्कस स्टोईनेसले समान दुई दुई तथा जस हेजलवुडले एक विकेट लिए ।
जितसँगै भारत अपराजित रुपमा सेमिफाइनल प्रवेश गरेको छ । पराजित अस्ट्रेलियाको सेमिफाइनल प्रवेशको झिनो सम्भावना भने बाँकी रहेको छ ।
मंगलबार बिहान हुने खेलमा बंगलादेशले अफगानिस्तानलाई पराजित गरेमा अस्ट्रेलियाको सेमिफाइनल प्रवेशको सम्भावना छ ।
