काठमाडौं । अन्तर्राष्ट्रिय क्रिकेट परिषद ( आइसीसी) २०२६ मा हुने विश्वकपको क्षेत्रीय छनोटमा केही नियम परिवर्तन गरेको छ ।
भारत र श्रीलंकामा संयुक्त रुपमा आयोजना हुने २०२६ विश्वकपमा १२ राष्ट्रको छनोट भई सकेको छ । बाँकी रहेका आठ राष्ट्रहरु विभिन्न क्षेत्रीय छनोटबाट छानिएर आउने छन् । जसमा एसिया र एसिया प्यासेफिक क्षेत्रीय छनोटलाई एउटै बनाउँने आइसीसीले नयाँ नियम बनाएको छ । श्रीलंकामा बसेको आइसीसीको बोर्ड बैठकले यस्तो नियम बनाएको हो ।
आइसीसीको नयाँ नियम अनुसार अब एसिया क्षेत्रीय छनोटबाट तीन राष्ट्र छनोट हुनेछन् । अफ्रिका र युरोप छनोटबाट समान दुई दुई तथा अमेरिका छनोटबाट एक राष्ट्र छनोट हुनेछन् ।
विश्वकप २०२६ स्थान बनाईसकेका राष्ट्र :
नवौं संस्करणको विश्वकपको सुपर एटमा पुगेका सात टोली (दक्षिण अफ्रिका, इंग्ल्यान्ड, अफगानिस्तान, अस्ट्रेलिया, अमेरिका, वेस्ट इन्डिज, बंगलादेश), आयोजक (भारत र श्रीलंका) तथा वरियताक्रममा सुपर एटमा स्थानबनाउँन नसकेका तीन टोली (पाकिस्तान, न्युजिल्यान्ड र आयरल्यान्ड) सिधै छनोट भएका छन् ।
कसरी हुन्छ त एसिया तथा एसिया प्यासेफिक छनोट :
एसिया छनोटमा जम्मा आईसीसीको प्रारम्भिक जानकारी अनुसार नौ राष्ट्रको सहभागीता रहने छ । नवौं संस्करणको विश्वकपमा सहभागीता जनाएकाले नेपाल, ओमान तथा पपुवा न्यु गिनी (पिएनजी)ले छनोटमा सिधै स्थान बनाएका छन् । बाँकी राष्ट्र भने उप क्षेत्रीय छनोट चरण पार गरेर आउने छन् ।
उपक्षेत्रीय छनोटबाट आउने छ टोली मुख्य छनोटमा स्थान बनाउँने छन् । एसिया तथा एसिया प्यासेफिक क्षेत्रीय छनोटको शीर्ष तीनमा रहने टोली विश्वकपका लागि छनोट हुनेछ ।
नेपाल कसरी हुन्छ त छनोट :
नेपालले वेस्ट इन्डिज र अमेरिकामा आयोजना भएको नवौं संस्करणको टी-२० विश्वकपमा सहभागी भएको थियो । नेपाल दशौं संस्करणको विश्वकपमा पनि सहभागी हुन एसिया तथा एसिया प्यासेफिक क्षेत्रीय छनोटको शीर्ष तीनमा रहन जरुरी रहने छ ।
