काठमाडौं । श्रीलंकामा जारी एसीसी महिला एसिया कपमा भारतसँग पराजित हुँदै नेपाल यस संस्करणको एसिया कपबाट बाहिरिएको छ । डम्बुलामा भएको खेलमा भारतले नेपालमाथि ८२ रनको जित हात पारेको हो ।
भारतले दिएको १ सय ७९ रनको लक्ष्य पछ्याएको नेपालले २० ओभरमा ९ विकेट गुमाएर ९६ रन मात्र बनाउँन सक्यो ।
नेपालका लागि ओपनर सिता राना मगरले २२ बलमा १८ तथा बिन्दु रावलले १९ बलमा अविजित १७ रन बनाईन् । ईनिङको पहिलो बलमा चौका प्रहार गर्दै नेपालले राम्रो सुरुआत गरे पनि नियमित रुपमा विकेट गुमाउँदा कम रनमा रोकिन पुग्यो ।
रुबिना क्षेत्रीले १६ बलमा १५ तथा कप्तान ईन्दु बर्माले १८ बलमा १४ रन बनाईन् ।
भारतका लागि दिप्ती शर्माले तीन तथा अरुणधती रेड्डी र राधा यादवले समान दुई दुई विकेट लिईन् । रेनुका सिंहले एक विकेट लिईन् ।
त्यसअघि टस जितेर पहिले ब्याटिङ गरेको भारतले निर्धारित २० ओभरमा ३ विकेट गुमाएर १ सय ७८ रन बनाएको थियो ।
भारतका लागि ओपनर शेफाली बर्माले ४८ बलमा १२ चौका र १ छक्काको सहयोगमा ८१ रनको अर्धशतकीय ईनिङ खेलिन् । अर्की ओपनर दयालन हेमलथाले ४२ बलमा ४७ रनको योगदान गरिन् ।
पहिलो विकेटका लागि बर्मा र हेमलथाले पहिलो विकेटका लागि १ सय २२ रनको शतकीय साझेदारी गरे ।
चौधौं ओभरको अन्तिम बलमा नेपालकी सिता राना मगरले ओपनिङ साझेदारी तोडेकी थिईन् ।
जेमिमा रोड्रिगेजले १५ बलमा २८ रन बनाईन् ।
नेपालको लागि सिता राना मगरले दुई तथा कविता जोशीले एक विकेट लिईन् ।
जितसँगै भारत समूह ए बाट अपराजित रुपमा शीर्ष स्थानमा रहदै सेमिफाइनल पुगेको छ । नेपाल एक खेलमा जितका साथ समूहको तेस्रो स्थानमा रहँदै यस संस्करणको प्रतियोगिताबाट बाहिरिएको छ ।
