- विकेटनेपाल – २३ माघ, बुधवार
यसै साता सम्पन्न युएई बिरुद्धको मैत्रीपूर्ण टि-२० अन्तर्राष्ट्रिय शृंखलामा प्लेयर अफ दि सिरिज घोषित अभिनास बोहरालाई गृह नगर नेपालगन्जमा बुधवार भव्य सम्मान सहित नगर परिक्रमा गराइएको छ।
बांके जिल्ला क्रिकेट संघको अगुवाईमा बुधवार बिहान पुस्पलाल चोक बाट शुरु शुरु भएको नगर परिक्रमा धम्बोझी बिपि चोक हुँदै त्रिभुवन चोकमा पुगेर समापन भएको क्रिकेट संघका बांके अध्यक्ष दुर्गा बहादुर थापा मगरले जानकारी दिनु भयो।
सम्मान कार्यक्रममा बांकेका खेलप्रेमी, खेलाडी तथा नगरबासीहरुको उल्लेख्य सहभागिता रहेको थियो। सम्मान कार्यक्रममा प्रदेश सांसद सुरेन्द्र हमालले आफू पनि पूर्व खेलाडी भएकोले खेलाडी को समस्यामा सधै हातेमालो गरेर अगाडि जाने बताउनुभयो।
कार्यक्रम नेपालगन्ज उपमहानगरपालिकाका उप. प्रमुख उमा थापा मगरले नगरपालिकाको तर्फ बाट पनि बोहरा लाई सम्मान कार्यक्रमको आयोजना गर्ने जानकारी गराउनु भयो। थापाले अहिले कार्यबिधी निर्माणको क्रममा रहेकाले छिटै सम्मानको कार्यक्रम राख्ने बताउनुभयो।
बांके जिल्ला क्रिकेट संघका अध्यक्ष दुर्गा थापा मगरको सभापतित्वमा भएको कार्यक्रममा क्यानका केन्द्रिय सदस्य संन्जय राज सिह, खेलकुद बिकास समिति अध्यक्ष आतंक बस्नेत, प्रशिक्षक दिपेन्द्र प्रताप सिंह लगायतको सहभागिता रहेको थियो।
बोहरा गृहनगरमा स्थानीय नेपाल टाइगर क्रिकेट क्लब बाट विभिन्न प्रतियोगिता खेल्ने गर्थे। नेपाली टोलीमा छनौट भएपछि आफ्नो पहिलो शृंखलामा नै युएई बिरुद्ध उनले पहिलो खेलमा १, दोस्रो खेलमा ३ तथा तेस्रो खेलमा २ विकेट लिंदै प्लेयर अफ दि सिरिज घोषित भएका थिए।
समाचार तथा तस्विर : सुनिल रेग्मी
